साफको टिकेटिङ अधिकार ८० लाखमा बिक्री

काठमाडौं। साफ महिला च्याम्पियनसिप २०२४ को टिकेटिङ अधिकार माउन्ट एभरेस्ट स्पोर्ट्स एन्ड इभेन्ट्स प्रालिले टेन्डर प्रक्रियामार्फत् ८० लाख रुपैयाँमा लिएको छ। अखिल नेपाल फुटबल संघ एन्फाले यो साफबाट समग्रमा एक करोड सात लाख रुपैयाँ कमाउने भएको छ।

एन्फा कम्प्लेक्स, सातदोबाटोमा मंगलबार भएको टिकेटिङ अधिकार बिक्रीको सम्झौता–पत्रमा एन्फाका महासचिव किरण राई र माउन्ट एभरेस्ट स्पोर्ट्स एन्ड इभेन्ट्सका सिइओ थम्मन भुसालले हस्ताक्षर गरे। एन्फाले एडी रिलिजलाई टेलिभिजन ब्रोडकास्टिङ, मार्केटिङ र डिजिटल अधिकार २५ लाख रुपैयाँमा बिक्री गरिसकेको छ।

तसर्थ एन्फाले सातौं साफ महिला च्याम्पियनसिपको टिकेटिङ, टेलिभिजन ब्रोडकास्टिङ, मार्केटिङ र डिजिटल अधिकार बिक्रीबाटमात्रै एक करोड पाँच लाख रुपैयाँ आर्जन गर्ने भएको छ, जुन छैटौं संस्करणको तुलनामा ४२ लाख बृद्धि भएको हो। काठमाडौंमै दुई वर्षअघि भएको छैटौं संस्करणको टिकेटिङ, ब्रोडकास्टिङ र मार्केटिङ अधिकार एन्फाले हन्ड्रेड स्पोर्ट्स म्यानेजमेन्टलाई ६३ लाख रुपैयाँमा बिक्री गरेको थियो।

सम्झौतापछि सिइओ भुसालले भने, ‘नेपालमा महिला फुटबल निक्कै लोकप्रिय छ र टिमले पनि उत्कृष्ट प्रदर्शन गरिरहेको छ। त्यसैले महिला फुटबललाई साथ दिनको लागि यो साफको टिकेटिङ राइट्समा ८० लाख रुपैयाँ लगानी गरिएको हो। यसले नेपाली फुटबललाई व्यवसायिक बाटोमा अगाडि बढाउन सहयोग गर्ने विश्वास छ।’

यसपालि एन्फाले रंगशालामा फुड स्टल दुई लाख रुपैयाँमा शिवांश फुड एन्ड वेभरेजलाई दिएको छ। त्यसैले एन्फाले सातौं साफ महिला च्याम्पियनसिपबाट कुल एक करोड सात लाख रुपैयाँ आर्जन गर्ने भएको छ।

७ टिम, १२ खेल

सातौं साफमा १२ खेल सञ्चालन हुनेछन्। लिग चरणमा नौ, सेमिफाइनलमा दुई तथा फाइनलमा एक खेल हुनेछन्। यी सबै खेल कार्तिक १ देखि १४ गतेसम्म दशरथ रंगशालामा सञ्चालन गरिनेछ। वैकल्पिक मैदानको रूपमा एन्फा कम्प्लेक्स, सातदोबाटो रहेको छ।

साफमा लगातार दोस्रोपल्ट दक्षिण एसियाली सातै देशका टिमले प्रतिस्पर्धा गर्दैछन्। डिफेन्डिङ च्याम्पियन बंगलादेश, कीर्तिमान पाँचपल्टको विजेता भारत र पाकिस्तान समूह ‘ए’ मा छन् भने घरेलु टिम नेपालसहित श्रीलंका, माल्दिभ्स र भुटानले समूह ‘बी’ मा प्रतिस्पर्धा गर्नेछन्। समूहका शीर्ष दुई टिम सेमिफाइनलमा प्रवेश गर्नेछन्।

भुटान बुधबार आइपुग्ने छ। बाँकी सबै टिम काठमाडौं ओर्लिसकेका छन्।

साफ महिला लगातार तेस्रोपल्ट नेपालमा

नेपालले लगातार तेस्रोपल्ट साफ महिला च्याम्पियनसिप आयोजना गर्न लागेको हो। सन् २०१० मा कक्सबजार, बंगलादेशबाट सुरु भएको साफ महिला च्याम्पियनसिपको पाँचौं संस्करण विराटनगर (२०१९) मा भएको थियो भने छैटौं संस्करण २०२२ (काठमाडौं) मा आयोजना गरिएको थियो।

नेपाली टिम सातमध्ये ६ संस्करणको उपविजेता पनि हो। दशरथ रंगशालामा भएको दुई वर्षअघिको फाइनलमा नेपाललाई ३–१ ले हराएर बंगलादेश पहिलोपल्ट साफ च्याम्पियन भएको थियो। सुरुका पाँच संस्करणमा भारत च्याम्पियन भएको थियो।

बजेट ४ करोड ६० हजार

एन्फाले मंगलबार पत्रकार सम्मेलन गर्दै चार करोड ६० हजार आठ सय रुपैयाँ बजेटमा साफ महिला च्याम्पियनसिप २०२४ आयोजना गर्न लागेको जनाएको छ। दुई वर्षअघिको साफ तीन करोड ४७ लाखको बजेटमा सञ्चालन गरिएको थियो।