काठमाडौं । अन्तर्राष्ट्रिय मोटरसाइकल फेडेरेसन (एफआईएम)का प्रशिक्षकहरु र १ सय १० जना सहभागी भएको एफआईएम एसिया रेस अफिसियल तथा मार्सल तालिम काठमाडौंमा सम्पन्न भएको छ । भदौ २८ र २९ गते काठमाडौँमा सम्पन्न भएको तालिममा मोटोजिपी र फर्मुला वान रेसका अफिसियलले प्रशिक्षण दिएका थिए ।
नेपाल अटोमोवाइल्स एसोसिएसनको मोटरसाइकल तथा टेनिङ्ग कमिसनको संयोजन, एफआईएम एसियाको सहयोग तथा माटोभर्स स्पोर्टस् क्लवको व्यवस्थापनमा भएको तालिममा सहभागीलाई रेस संचालन, व्यवस्थापन तथा मार्सलिङ्गको तालिम प्रदान गरिएको थियो । एफआईएम एसियाका प्रशिक्षकहरु सुजित कुमार, समिर सुनेजा तथा मन्दिप सिंहले इभेन्ट डिजाइन, खेल संचालन, मार्सलिङ्ग तथा मार्सलको काम, कर्तव्य र अधिकार, सेफ्टी र कम्यूनिकेसन तथा रिपोर्टिङ्ग जस्ता विषयमा प्रशिक्षण दिए । त्यस्तै संघका वरिष्ठ उपाध्यक्ष प्रा.डा बुलन्द थापाले रेसमा मेडिकल र रेस्कुका साथै खेलमा डोपिङ्गसम्बन्धि नियम, प्रचलन तथा टेस्टको प्रक्रियाको बारेमा प्रशिक्षण दिएका थिए ।
नेपाल अटोमोवाइल्स एसोसिएसनका अध्यक्ष दशरथ रिसालको अध्यक्षतामा भएको तालिममा बागमती प्रदेश खेलकुद विकास परिषदका नव नियुक्त सदस्य सचिव दिपक लामा, एफआईए वल्र्ड काउन्सील मेम्बर तथा नासा नेपालका कार्यकारी निर्देशक गोविन्द भट्टराई, राष्ट्रिय खेलकुद परिषदका बोर्ड सदस्य चन्द्रवदना राई, नेपाल ओलम्पीक कमिटीका कार्यकारी सदस्य रमेश सिवाकोटी, बागमती प्रदेश खेलकुद विकास परिषदका पूर्व सदस्य सचिव सूर्य लाल भण्डारी र सदस्य सुनिता गौतम, नेपाल स्पोर्ट क्लाइम्बिङ्ग एसोसिएसनका अध्यक्ष रमेश पौड्याल लगायत विशिष्ट अतिथीको उपस्थिती थियो । तालिमका संचालक नासा नेपालका उपाध्यक्ष अनिलकुमार बराल र स्वागत माटोभर्स स्पोर्टस् क्लवका अध्यक्ष आशिष रौनियार थिए ।
कार्यक्रममा बागमती प्रदेश खेलकुद विकास परिषदका नव नियुक्त सदस्य सचिव दिपक लामालाई बधाई तथा शुभकामना दिइएको थियो ।
सदस्य सचिव लामाले नेपालमा साहासिक खेलको सम्भावना तथा गौरीटारमा प्रस्तावित नेपालकै पहिलो रेसिङ्ग सर्किटमा थप लगानी वृद्धि गरी समयमै निमार्ण सक्ने प्रतिवद्धता दिएर सहभागीको हौसला बढाएका थिए ।
