डीआरएस र होराले पब्जी मोबाइल ग्लोबल च्याम्पियनसिप खेल्ने

काठमाडौं। नेपालका दुई टिम डीआरएस गेमिङ र होरा ई–स्पोर्ट्सले पब्जी मोबाइल ग्लोबल च्याम्पियनसिप (पीएमजीसी) २०२४ खेल्ने निश्चित गरेका छन्। काठमाडौंमा शनिबार सम्पन्न पब्जी मोबाइल सुपर लिग सेन्ट्रल एन्ड साउथ एसिया (पीएमएसएल सीएसए) फल २०२४ फाइनल्समा उत्कृष्ट प्रदर्शन गर्दै ग्लोबल च्याम्पियनसिपमा स्थान बनाएका हुन्।

तीन साता सञ्चालित दुई लाख अमेरिकी डलर (करिब दुई करोड ६८ लाख रुपैयाँ) पुरस्कारको प्रतियोगिता पीएमएसएल सीएसएमा सात देशका २० टिमले प्रतिस्पर्धा गरेका थिए। लिग स्टेजका शीर्ष १६ टिमले अन्तिम दिनको फाइनल्स खेल्ने अवसर पाएका थिए, जसमा डीआरएसले चौथो र होराले छैटौं स्थान हासिल गर्दै ३० लाख डलर (करिब ४० करोड २८ लाख रुपैयाँ) पुरस्कारको पीएमजीसी २०२४ को यात्रा तय गरेका हुन्।

डीआरएस १५१ अंकसहित पीएमजीसी साउथ एसिया पोइन्टको शीर्षस्थानमा रहेको आधारमा ग्लोबल च्याम्पियनसिपमा छनोट भएको हो। यससँगै डीआरएसले लगातार पाँचौंपल्ट विश्वकै सर्वाधिक प्रतिष्ठित पब्जी प्रतियोगिता खेल्ने भएको छ। डीआरएस इन्डोनेसियामा भएको ग्लोबल च्याम्पियनसिप २०२२ को उपविजेता पनि हो।

पीएमजीसी २०२४ को फाइनल्स डिसेम्बरमा लन्डन, बेलायतमा हुनेछ, जसमा आयोजक क्षेत्रका एक र लिग स्टेजका शीर्ष १५ गरी कुल १६ टिमले प्रतिस्पर्धा गर्नेछ। आयोजक क्षेत्रका टिमको रूपमा इङ्ल्यान्डका पूर्वफुटबलर डेभिड वेक्हामको गिल्ड ईस्पोर्ट्स छनोट भइसकेको छ। लिग स्टेजमा ४८ टिम हुनेछ। डीआरएस र होराले लिग स्टेज अक्टोबर–नोभेम्बरमा मलेसियामा खेल्नेछन्।

पीएमएसएल सीएसएमा १३६ अंक जोड्दै होरले पहिलोपल्ट पीएमजीसीको टिकट काटेको हो। यस प्रतियोगिताबाट होरसँगै मंगोलियाको स्टलवार्ट ई–स्पोर्ट्स (१५८ अंक), कजाखस्तानको मेजर प्राइड (१५२), रुसको डे मुएर्टे (१३४), पाकिस्तानको एएस आई ८ ई–स्पोर्ट्स (१२४) र कजाखस्तानको एओआर ई–स्पोर्ट्स (१२२) पनि पीएमजीसीको लागि छनोट भएका छन्। स्टलवार्ट पीएमजीसी २०२३ को उपविजेता हो।

मंगोलियन टिमको वर्चस्व
पीएमएसएल सीएसए २०२४ को शीर्ष तीन स्थान मंगोलियन टिमले कब्जा गर्‍यो। फोरमेकिल भाइब्स १७३ अंकसहित च्याम्पियन भयो। यो टिम पीएमजीसी २०२३ मा चौथो भएको थियो।

फ्याल्कन फोर्स (१६३) उपविजेता भयो भने स्टलवार्ट (१५८) तेस्रो स्थानमा रहे। यस्तोमा फोरमेरिकलले सेन्ट्रल एसिया र फ्याल्कनले सेन्ट्रल तथा साउथ एसिया क्षेत्रमा सर्वाधिक पीएमजीसी प्वाइन्ट बनाएको आधारमा पीएमजीसी २०२४ मा सीधै स्थान बनाए।

काठमाडौंमा पीएमजीसी २०२३ च्याम्पियन आईएचसी ई–स्पोर्ट्सको प्रदर्शन राम्रो भएन। मंगोलियाको यो टिम ८९ अंक मात्रै बटुलेर पीएमएसएल सीएसएमा १३औं स्थानमा रह्यो। त्यसैले पीएमजीसी २०२४ खेल्ने सम्भावना आमन्त्रण कोटामा निर्भर भएको छ।

ट्रफी उचालेको फोरमेकिलले ३३ हजार डलर (करिब ४४ लाख ३० हजार रुपैयाँ) हात पार्‍यो भने नेपाली टिमहरू डीआरएसले १३ हजार डलर (करिब १७ लाख ४५ हजार रुपैयाँ) र होराले आठ हजार डलर (करिब १० लाख ७४ हजार रुपैयाँ) प्राप्त गरे।