काठमाडौं। युवा तथा खेलकुदमन्त्री तेजुलाल चौधरीले खेलकुदका क्षेत्रमा सरकारले सबैभन्दा कम बजेट विनियोजन गर्ने गरेकाले सोचेअनुरुपको काम गर्न नसकिएको बताए। अहिले संघीय सरकारको २१ वटा मन्त्रालयमध्ये खेलकुद मन्त्रालयमै सबैभन्दा कम बजेट रहेको उनले सुनाए।
‘खेलकुदमा सबैभन्दा कम बजेट विनियोजन हुन्छ। २१ वटा मन्त्रालयमध्ये सबैभन्दा कम बजेट यसैमा छ। त्यसकारण तालिम सञ्चालन गर्न, खेलाडीलाई तलब दिन त्यति सजिलो छैन। विभिन्न संघहरुले आफ्नै किसिमको तलब निर्धारण गरेर दिइराखेका छन्,’ उनले भने।
मुलपानीमा रहेको अन्तर्राष्ट्रिय क्रिकेट रङ्गशालाको डीपीआर तयार भइसकेको र बहुवर्षीय योजनाका लागि राष्ट्रिय योजना आयोगमा यही हप्ता पेश हुने उनले बताए। सरकारले रकमको सुनिश्चितता गरिसकेपछि कार्यक्रम सुरु हुने उनको भनाइ छ।
वर्तमान सरकारको पहिलो निर्णय कीर्तिपुर रंगशाला तीन सय दिनमा तयारी गर्ने पहिलो निर्णय गरेको बताउँदै उनले त्यसका लागि २० करोड रुपैयाँ छुट्याइएको बताए। उक्त कामको टेन्डर गर्न बाँकी रहेको छ। सो काम तीन सय दिनमा पूरा गर्न सम्भव नदेखिएपछि खेलकुद मन्त्रालय र खेलकुद परिषद्ले सहरी विकास मन्त्रालयलाई जिम्मा दिएको पनि उनले बताए।
प्रधानमन्त्री केपी शर्मा ओली नेतृत्वको वर्तमान सरकारले कीर्तिपुर क्रिकेट मैदानलाई सुविधासम्पन्न रंगशाला बनाउने, जसमा दर्शक बस्नका लागि प्याराफिट, रात्रिकालीन खेलको लागि फ्लडलाइट निर्माणलगायतका आवश्यक संरचना तीन सय दिनभित्र निर्माण गर्ने निर्णय गरेको थियो।
‘यो सरकार आइसकेपछि पहिलो क्याविनेटको बैठकबाट कीर्तिपुर रंगशाला तीन सय दिनमा तयारी गर्ने पहिलो निर्णय भएको छ। त्यसमा खेलकुद मन्त्रालय र राष्ट्रिय खेलकुद परिषद्ले छलफल गरेर २० करोड रुपैयाँ छुट्याइएको थियो। डीपीआर बनाउने, त्यसको मास्टर प्लानिङ जति तयारी भएको थियो खेलकुदबाट त्यसलाई हामीले सहकारी विकास मन्त्रालयमा ह्यान्डओभर गरेका छौं,’ उनले भने।
रंगशालाको टेन्डर गर्नै बाँकी छ। तीन पटकमा काम गर्नुपर्ने शर्तमा टेन्डर हुँदैछ।
-1734511871.jpeg)
