काठमाडौँ । स्पेनिस क्लब बार्सिलोनाको फ्यान क्लब बार्सा नेपालले 'पेन्या बार्सा दी एभरेस्ट'को रुपमा नेपालको आधिकारिक समर्थकको क्लबको रुपमा मान्यता पाएको छ ।
पछिल्लो एक दशकदेखि आधिकारिक समर्थकको क्लब हुन प्रयास गरिरहेको बार्सा नेपालले हालैमात्र सो मान्यता प्राप्त गरेको हो ।
सो अवसरमा बार्सा नेपालले काठमाडौंमा शनिबार एक औपचारिक कार्यक्रमको आयोजना गर्यो । हालै एफसी बार्सिलोनामा आधिकारिक पेन्या समर्थक क्लबको रूपमा आफ्नो दर्ता पूरा गरेको बार्सा नेपालले भेटघाट कार्यक्रमको आयोजना गरेको हो ।
सन् २०१३ मा स्थापना भएको एफसी बार्सिलोना समर्थक समूहले विगत एक दशकदेखि च्यारिटी कार्यक्रम, फुटबल प्रतियोगिता र देशभरि विभिन्न सामाजिक सेवाका गतिविधिहरू गर्दै आइरहेको छ ।
सचिव सिताराम दाहालले उपस्थित अतिथी र सम्पुर्णलाई स्वागत गरे ।
मुख्य अतिथि पूर्व नेपाली राष्ट्रिय फुटबल खेलाडी विक्रम लामाले अध्यक्ष प्रकाश घर्तीको साथमा आधिकारिक रूपमा पेन्या बार्सा दी एभरेस्टको नयाँ लोगो अनावरण गरेका थिए ।
कार्यक्रममा विशेष भिडियो सत्र पनि समावेश गरिएको थियो, जसमा नेपाली एफसी बार्सिलोना समर्थकहरूको भावनात्मक सन्देश प्रस्तुत गरिएको थियो ।
सय भन्दा बढी नेपाली बार्सिलोना समर्थकहरू उपस्थित कार्यक्रममा खेलकुद क्षेत्रका चर्चित अनुहार फुटबलर हरि खड्का, राष्ट्रिय महिला भलिबल खेलाडी उषा भण्डारी लगायतको उपस्थिती रहेको थियो ।
विशेष अतिथिका रूपमा ई स्पोर्ट्स संघ नेपालका वरिष्ठ उपाध्यक्ष हिमबिक्रम केसी, सचिव आशिष दाहाल, बोर्ड सदस्य घनश्याम ढुंगेल, राष्ट्रिय फुटसल टिमका सहायक प्रशिक्षक थमन भुसालको पनि उपस्थिती थियो ।
उपस्थित सदस्यलाई बार्सिलोनाबाट आएको मायाको चिनो सहित 'पेन्या बार्सा दी एभरेस्ट'का क्यापहरू प्रदान गरियो, जुन स्पेनबाट आएको थियो ।
मुख्य अतिथी बिक्रम लामाले पेन्या बार्सा दी एभरेस्टलाई बार्सिलोनाको आधिकारिक समर्थक क्लबको मान्यता दिइनुले नेपालका फुटबल समर्थकका लागि एक महत्वपूर्ण उपलब्धिको रुपमा ब्याख्या गरे । उनले बार्सिलोना क्लब र नेपालमा यसको समर्पित समर्थकहरूको बीचको बलियो सम्बन्धलाई थप सुदृढ बनाउन सहयोग पुग्ने उनको कथन थियो ।
पेन्या बार्सा दी एभरेस्टका अध्यक्ष प्रकाश घर्तिले निकै प्रयासपछि आफुहरुले बार्सिलोनाबाट आधिकारिक रुपमा मान्यता प्राप्त गर्न सकिएको बताए । उनले फ्यान क्लबले खेलकुदसँगै सामाजिक काममा आफुहरुलाई अझ क्रियाशिल बनाउने उल्लेख गरे ।
कार्यक्रममा बार्सिलोनाका अध्यक्ष जुवान लापोर्टाको भिडियो सन्देश समेत प्रस्तुत गरिएको थियो ।
-1734511871.jpeg)
