श्रीलंकाविरुद्ध इरानको रोमाञ्चक जित

काठमाडौं। इरानले काभा वुमन्स नेसन्स भलिबल लिगमा पहिलो जित हासिल गरेको छ। 

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा शुक्रबार भएको खेलमा इरानले श्रीलंकलाई ३–२ को सेटमा पराजित गरेको हो। इरानले पहिलो सेट २५–२० र दोस्रो सेट २५–१२ ले आफ्नो पक्षमा पारेको थियो निकै प्रतिस्पर्धात्मक बनेको तेस्रो सेटमा सुरुआती समयबाटै अग्रता बनाएको श्रीलंकाले २२–२५ ले आफ्नो पक्षमा पर्न सफल भयो। 

त्यसपछि सानदार पुनरागमन गरेको श्रीलंकाले चौथो सेट १३–२५ ले सहजै आफ्नो पक्षमा पार्न सफल भयो। त्यसपछि पाँचौँ सेटमा पुग्यो। पाँचौं तथा निर्णायक सेटमा इरान १५–११ ले विजयी भयो। जितसँगै इरानले दुई खेलमा दुई अंक जोडेको छ। दुवै खेलमा पराजित श्रीलंकाको एक अंक छ।

पहिलो खेलमा भारतसँग इरान ३–१ को सेटमा पराजित भएको थियो। श्रीलंका भने नेपालसँग ३–० को सेटमा पराजित भएको थियो। यस प्रतियोगितामा नेपालसहित भारत, इरान, माल्दिभ्स र श्रीलंका गरी पाँच देशको सहभागिता छन्।