काठमाडौं। नेपाली टेबल टेनिसमा इतिहासमा स्यान्टु श्रेष्ठ त्यसको नाम थियो, जसले पहिलोपल्ट छनोटचरण पार गरेर पेरिस ओलम्पिक २०२४ मा स्थान बनाएका थिए। उनी यो ओलम्पिकमा छनोटचरण पार गरेर स्थान बनाउने एकमात्रै खेलाडी थिए। त्यसैले पनि उनीमाथि ठूलो आस राखिएको थियो। तर, शनिबार साउथ पेरिस एरिना ४ मा भएको प्रिलिमिनरी राउन्डको पुरुष सिंगल्समा स्यान्टुले सेनेगलका इब्राहिम डिएवलाई चुनौती दिन सकेन। र, पराजित भए, ४–० को सोझो सेटमा।
‘बेस्ट अफ सेभेन’ को खेलमा इब्राहिमले स्यान्टुलाई १२–१०, ११–३, ११–४ र ११–५ ले हराए। इब्राहिमलाई जित निकाल्न २४ मिनेट मात्रै लागेको थियो। पहिलो सेटको नतिजा ८ मिनेटमा आफ्नो पक्षमा पारेका इब्राहिमले दोस्रो र तेस्रो सेट जित्न समान ५–५ मिनेट लगाए। चौथो सेट इब्राहिमले ६ मिनेटको अवधिमा जिते। पहिलो सेटमा श्यान्टु ७–३ ले अगाडि रहेको अवस्थालाई उल्ट्याउदै इब्राहिमले जित हात पारेका थिए। बाँकी सेटको नतिजा भने इब्राहिमले सहजै आफ्नो पक्षमा पारे। हारसँगै स्यान्टु प्रतियोगिताबाट बाहिरिएका छन् भने इब्राहिम राउन्ड अफ ६४ मा प्रवेश गरेका छन्।
चारपटकका राष्ट्रिय च्याम्पियन स्यान्टुले सोचेभन्दा फरक नतिजा आएको बताए। ‘प्रतिद्वन्द्वी राम्रो भएपनि ४–० को नतिजा मैले सोचेको नतिजा भने होइन। ओलम्पिकमा पहिलो सहभागिता भएकाले पनि नर्भस पनि भएँ। दक्षिण एसियाली खेलकुद, एसियाली खेलकुदलगायत थुप्रै अन्तर्राष्ट्रिय प्रतियोगिताको अनुभव छ। तर, ओलम्पिक सोचेभन्दा फरक हुँदोरहेछ,’ २४ वर्षीय स्यान्टुले भने।
दक्षिण एसियाली खेलकुद (साग) को एकै संस्करणमा चार पदक जित्ने खेलाडी हुन् स्यान्टु। नेपालमा भएको १३औं सागमा उनले टिम इभेन्टमा रजत तथा सिंगल्स, डबल्स र मिक्स डबल्समा कांस्य जितेका थिए।
विगत दुई वर्षयता अध्ययनको सिलसिलामा अस्ट्रेलिया बस्दै आएका उनले ओलम्पिकको तयारी पनि अस्ट्रेलिया मै गरेका थिए। ओलम्पिकमा सहभागी हुन अस्ट्रेलियाबाट पेरिस आएका उनी पेरिसबाटै अस्ट्रेलिया जाने छन्।
उनका प्रशिक्षक राजेन्द्र कपालीले श्यान्टुले सक्दो राम्रो खेलेको प्रतिक्रिया दिँदै प्रतिद्वन्द्वी धेरै राम्रो भएकाले हार बोहोर्नु परेको बताए।
‘उनले सक्दो राम्रो खेलेका हुन्। प्रतिद्वन्द्वी धैरे राम्रो खेलाडी हो। इब्राहिमको फोरह्यान्ड र ब्याकह्यान्ड पावर ड्राइभ एकदमै राम्रो थियो। हामीले शत हानेको बललाई इब्राहिमले रोक्ने होइन कि उल्टै हानी रहेका हुन्थे,’ टेबलटेनिसका मुख्य प्रशिक्षकसमेत रहेका कपालीले भने, ‘पहिलो सेटमा श्यान्टु ७–३ ले अगाडि थिए। त्यो सेट जितेको भए प्रतिद्वन्द्वीमाथि राम्रै दबाब कायम गर्न सकिन्थ्यो।’
