काठमाडौं। नेपालले घरेलु मैदानमा आयोजना हुने काभा वुमन्स नेसन्स भलिबल लिगको उद्घाटन खेलमा श्रीलंकासँग भिड्ने भएको छ।
नेपाल भलिबल संघले सार्वजनिक गरेको खेल तालिका अनुसार नेपालले श्रीलंका प्रतिद्वन्दी पाएको हो। आगामी साउन १७ गतेदेखि सुरु हुने लिगमा नेपाल र श्रीलंकासहित इरान, भारत र माल्दिभ्सले प्रतिस्पर्धा गर्दैछन्। नेपालले प्रतियोगिताको तयारीस्वरुप रसियासँग घरेलु मैदानमा दुई मैत्रीपूर्ण खेल खेलेको थियो।
सात दिन चल्ने प्रतियोगितामा पहिलो दिन नेपाल र श्रीलंका तथा भारत र इरानबीच प्रतिस्पर्धा हुनेछ। नेपालले दोस्रो खेल साउन १८ गते भारतसँग खेल्नेछ। त्यस्तै, तेस्रो खेल साउन २० गते माल्दिभ्स र लिगचरणको अन्तिम खेल साउन २१ गते इरानसँग खेल्नेछ।
प्रतियोगिता राउन्ड रोबिन लिगका आधारमा सञ्चालन हुनेछ। राउन्ड रोबिन लिगपछि अंकतालिकाको पहिलो र चौथो तथा दोस्रो र तेस्रोबीच साउन २२ गते सेमिफाइनल हुनेछन्।
