काठमाडौं। एभरेस्टका आर्यन शाही र युलेन्सकी शुभश्री श्रेष्ठले १०औं सोफेस राष्ट्रिय अन्तरविद्यालय टेबलटेनिस प्रतियोगितामा स्वर्ण जितेका छन्। यु–१६ सिंगल्सको ब्वाइजमा आर्यन र गर्ल्समा शुभश्री पहिलो भएका हुन्।
लैनचौरस्थित राष्ट्रिय टेबलटेनिस प्रशिक्षण केन्द्रमा भएको ब्वाइजको फाइनलमा आर्यनले गत जेठ अन्तिम साता पोखरामा भएको प्रथम यु–१५ विद्यालय खेलकुद प्रतियोगितामा तीन स्वर्ण जित्न सफल एभीएमका जयस्नु महर्जनलाई ११–९, १४–१२, ९–११, ६–११ र ११–९ को सेटमा पराजित गरे। भासारका रिजन शाक्य र न्यु होराइजनका सुविन क्षेत्री तेस्रो भए।
गर्ल्सको उपाधि भिडन्तमा शुभश्रीले सेन्ट मेरिजकी सुरम्य शाक्यलाई ११–८, ११–४ र ११–६ को सोझो सेटमा हराइन्। प्राइम ग्लोबलकी प्राज्णा महर्जन र एभीएमकी अर्सना महर्जन तेस्रो बने। ब्वाइज÷गर्ल्स दुवैमा शीर्ष तीन स्थान हात पार्ने खेलाडीले क्रमशः १५ हजार, ७ हजार ५ सय र ३ हजार नगद पुरस्कार प्राप्त गरे।
गोरखनाथ माविको सहकार्यमा सोफेस नेपालद्वारा आयोजित प्रतियोगिताको यु–१२ ब्वाइज सिंगल्समा डिलाइट किन्डरगार्तेनका आरम्भराज शाक्य पहिलो भए। उनले फाइनलमा जेम्सका अनमोल बजगाईंलाई ३–२ ले पाखा लगाए। सो स्पर्धाको गर्ल्स फाइनलमा आरुणीकी योजना पुन मगरले जेम्सकी सुहाना महर्जनलाई ३–१ ले पन्छ्याउदै पहिलो भइन्।
यु–१४ ब्वाइज सिंगल्समा श्रृष्टि एकेडेमीका अर्नव श्रेष्ठले स्वर्ण जिते। उनले फाइनलमा जेम्सका अर्चित शाहको चुनौती ३–० को सोझो सेटमा समाप्त पारे। उक्त स्पर्धाको गर्ल्स फाइनलमा दृष्टिका श्रेष्ठले स्वर्णिमकी सुप्रिया कपालीमाथि ३–१ को जित दर्ता गर्दै पहिलो बनिन्।
ब्वाइज टिम इभेन्टमा एभीएम पहिलो, भासारा दोश्रो तथा न्यु होराइजन र एभरेस्ट तेस्रो स्थानमा रहे। त्यसै स्पर्धाको गर्ल्समा पनि एभीएम नै शीर्ष स्थानमा रह्यो। प्रभात दोश्रो तथा मंगल र स्वस्तिश्री गुरुकुल तेस्रो भए। विजेतालाई नेपाल ओलम्पिक कमिटीका उपाध्यक्ष एवं कार्यकारी निर्देशक चतुरानन्दराज वैद्य, टेबलटेनिसका मुख्य प्रशिक्षक राजेन्द्र कपाली, सोफेसका अध्यक्ष प्रा.डा. रामकृष्ण महर्जनलगायतले एक कार्यक्रमबीच पुरस्कृत गरे।
प्रतियोगितामा विभिन्न ४४ विद्यालयका १ सय ७७ ब्वाइज र ७६ गर्ल्स गरी जम्मा २ सय ५३ खेलाडीले ८ स्पर्धामा प्रतिस्पर्धा गरेका थिए। यु–१६ सिंगल्समा मात्र नगद पुरस्कार राखिएको थियो।
