काठमाडौं। त्रिभुवन आर्मी क्लबका उपेन्द्र शाहीले छैटौं नेसनल फेन्सिङ च्याम्पियनसिपको पहिलो स्वर्ण पदक जितेका छन्। उनले फाइनलमा राजेन्द्र गजुरेल (एपीएफ) लाई फाइनलमा पराजित गर्दै पुरुषतर्फ साब्रे व्यक्तिगत स्पर्धामा स्वर्ण जितेका हुन्।
यो स्पर्धामा उपेन्द्रको जितसँगै राजेन्द्रको वर्चस्व पनि समाप्त भयो। पाँचौं संस्करणको फाइनलमा विजेता राजेन्द्रले उपेन्द्रलाई पराजित गरेका थिए। राजेन्द्र १३औं दक्षिण एसियाली खेलकुद (साग) का पनि पदक विजेता हुन्।
त्रिपुरेश्वरस्थित कभर्डहलमा सोमबार सुरु भएको तीन दिने च्याम्पियनसिपको पहिलो दिन भएको उक्त स्पर्धामा आर्मीकै रघुवीर चन्द र सुदूरपश्चिम प्रदेशका जलीन्द्र शाहीले कांस्य पदक हात पारे।
महिलातर्फ व्यक्तिगत इपी व्यक्तिगत स्पर्धा पनि पहिलो दिन सकएको छ, जसमा एपीएफ क्लबका अनिता कार्कीले स्वर्णपदक जितिन्। १३औं सागमा नेपाललाई पदक दिलाएकी अनिताले फाइनलमा आर्मीकी पुजन कुमाललाई पराजित गर्दै सफलता हात पारेकी हुन्। उक्त स्पर्धामा गण्डकी प्रदेशकी कृपा गुरुङ र एपीएफकै जानुका स्याङ्तानले कांस्यपदक प्राप्त गरे।
त्यस्तै, पुरुषतर्फ साब्रे टिम स्पर्धामा आर्मीले एपीएफलाई फाइनलमा हराएर स्वर्ण जित्यो। यसमा बागमती र गण्डकी प्रदेशले कांस्य पदक हात पारे।
च्याम्पियनसिपमा महिला र पुरुषका व्यक्तिगत तथा टिम गरी ६–६ स्पर्धासमावेश गरिएको छ, जसमा चार प्रदेश र दुई विभागीय टिमका १ सय १२ खेलाडी सहभागि छन्।
