पोखरा । पोखरामा क्रियाशिल युनाइटेड किङ्स क्लबको आयोजनामा हुने प्रथम खुल्ला भेट्रान्स (३५ प्लस) भलिबल प्रतियोगिताको तयारी अन्तिम चरणमा पुगेको छ ।
पोखरा महानगरपालिका–३ नदीपुरस्थित छन्त्याल समाजको भलिबल कोर्टमा यही १८ र १९ गते सञ्चालन हुने प्रतियोगिताको तयारी अन्तिम चरणमा पुगेको क्लबका सचिव अशोक थापाले जानकारी दिए ।
थापाका अनुसार अहिले १५ टिम दर्ता भइसकेको र टिम दर्ताको लागि बिहिवार दिउसो ३ बजे सम्म समय रहेको उनले बताए।
प्रतियोगिताको विजेताले ४० हजार, उपविजेताले २५ हजार रुपैयाँ पुरस्कार प्राप्त गर्ने थापाले बताए।
उनका अनुसार खुल्ला भेन्ट्रान्स पुरुष भलिबल प्रतियोगितामा ३५ वर्ष माथि उमेर समूहले मात्र सहभागिता जनाउन पाउनेछन् । प्रतियोगितामा दर्शकका लागि भने प्रवेश निशुल्क गरिएको छ ।
प्रतियोगितामा अनुमानित २५ बढी टिमको सहभागिता रहने आयोजकले जनाएको छ ।
खेल जीवनलाई ताजा बनाइराख्न र आपसी भाइचारालाई कायम गर्नका लागि ३५ वर्ष माथिका खेलाडीहरुलाई लक्षित गरेर प्रतियोगिता आयोजना गरिएको युनाइटेड किङ्स क्लबले जनाएको छ ।