‘बाँकी समय ओलम्पिकको तयारीका लागि भरपुर उपयोग गर्नू’

काठमाडौँ। राष्ट्रिय खेलकुद परिषद्का सदस्य–सचिव टंकलाल घिसिङले ब्याडमिन्टन खेलाडी प्रिन्स दाहाललाई भेट गरी बाँकी समय तयारीका लागि भरपुर उपयोग गर्न बताएका छन्।

सदस्य–सचिव घिसिङले सोमबार त्रिपुरेश्वरस्थित आफ्नै कार्यकक्षमा पेरिस ओलम्पिकका वाइल्ड कार्डमार्फत छनोट भएका प्रिन्सलाई भेट गरी सो सुझाव दिएका हुन्।

‘पेरिस ओलम्पिकका लागि छनोट हुनुभएकोमा हार्दिक बधाई। अब वाइल्ड कार्डका लागि खेल्न नपरेपनि अन्तर्राष्ट्रिय प्रतियोगितामा सहभागिता भने टुट्नु हुँदैन,’ उनले भने, ‘अन्तर्राष्ट्रिय सहभागिता भन्दैमा जुनसुकै प्रतियोगिता खेल्ने पनि होइन। आफूभन्दा वरीयतामा माथि र बलिया खेलाडीसँग खेल्ने वातावरण बनाउन संघको ध्यानाकर्षण गराउन चाहन्छु। अझ ओलम्पिककै लागि छनोट भएका अन्य राष्ट्रका खेलाडीसँग प्रतिस्पर्धा गर्ने अवसर मिले झन् राम्रो। तयारीका लागि परिषद्ले गर्ने सहयोगमा कुनै कमी हुनेछैन।’

सदस्य–सचिव घिसिङले प्रिन्सको तयारी प्रशिक्षणका लागि विशेषज्ञ प्रशिक्षकलाई नेपालमा बोलाउने वा प्रिन्सलाई विदेशमा पठाउने के गर्दा उपयुक्त हुन्छ त्यसको समन्वय गर्न संघलाई निर्देशन दिँदै हरेक अन्तर्राष्ट्रिय प्रतियोगितामा प्रिन्स सहभागी हुँदा होस् वा वैदेशिक प्रशिक्षणमा जाँदा नेपाली प्रशिक्षक पनि सँगै जाने व्यवस्था मिलाउनु पर्नेमा जोड दिए।

भेटकै दौरान सदस्य–सचिव घिसिङले प्रिन्सलाई आवश्यक पर्ने खेल सामाग्रीका विषयमा सोध्दै प्रिन्सले माग गरेको खेल सामाग्री सोमबारै राखेपले उपलब्ध गराएको छ।

प्रिन्सले ओलम्पिकमा छनोट भएकोमा खुसी व्यक्त गर्दै जिम्मेवारी पनि थपिएको महसुस गरेको प्रतिक्रिया दिए। प्रिन्स ओलम्पिकको ब्याडमिन्टनमा प्रतिस्पर्धा गर्ने पहिलो नेपाली खेलाडी हुने छन्।

भेटका अवसरमा नेपाल ब्याडमिन्टन संघका अध्यक्ष रामजीबहादुर श्रेष्ठ र ब्याडमिन्टनका मुख्य प्रशिक्षक सुदीप योञ्जनको पनि उपस्थिति रहेको थियो। अध्यक्ष श्रेष्ठले प्रिन्सलाई वाइल्ड कार्ड दिलाउन संघले पनि धेरै मिहिनेत गरेको बताए।

प्रिन्स हाल विश्व वरीयतामा १ सय ७९ औँ स्थानमा छन्। जुनिअर विश्व वरीयतामा प्रिन्स २०२३ देखि २०२४ को अवधिमा ६ महिना शीर्ष स्थानमा पनि थिए।