काठमाडौँ। गेटसेटगेमको आयोजनामा आगामी शनिबार र आइतबार न्यू ब्यालेन्स थ्री एक्स थ्री कर्पोरेट बास्केटबल प्रतियोगिता आयोजना हुने भएको छ।
माम्बा स्पोर्ट्स सेन्टरमा यही अप्रिल २७ र २८ तारिखमा हुने प्रतियोगितामा पुरुषतर्फ १४ र महिलातर्फ ४ टिमको सहभागिता हुनेछ।
पुरुषतर्फ लिग कम नकआउट र महिलातर्फ सिंगल राउन्ड रोविनका आधारमा खेल खेलाइने प्रतियोगिताको निर्देशक श्रेया खड्काले जानकारी दिइन्।
कर्पोरेट क्षेत्रमा लागेकाहरूलाई खेलकुदको मनोरञ्जन दिने र रिक्रिएसनका लागि यस प्रतियोगिता गर्न लागेको आयोजकले जनाएको छ। प्रतियोगितालाई नेपाल बास्केटबल संघ (नेबा) ले पनि सहयोग गरेको छ।
प्रतियोगितामा पुरुषतर्फ एकबाना सोलुसन्स, एजाइल सोलुसन्स, एफ वान सफ्ट ग्रुप, क्विनीभर्स, डोग्मा ग्रुप, क्लाउड फ्याक्ट्री, नेपाल इन्भेस्टमेन्ट मेगा बैँक, भाटभटेनी, पेपे पिजा, हिमालयन जाभा, इजी सर्भिस, लोगो प्वाइन्ट, आइएमई पे र स्विफ्ट टेक्नोलोजी छन्। यस्तै महिलातर्फ नेपाल इन्भेस्टमेन्ट मेगा बैँक, क्विनीभर्स र आइएमई पेसहित रेडक्ट नेपाल छन्।
