काठमाडौं । बागमती अटोमोबाइल्स एसोसिएसन र चितवन अटोमोबाइल्स डिलर एसोसिएसनको संयुक्त आयोजनामा नेपालमा पहिलो पटक हेटौँडामा अटोक्रस च्याम्पियनसिपको आयोजना भएको छ ।
हेटौँडास्थित गौरीटार रंगशालाभित्र एक किलोमिटर अस्थायी ट्रयाकमा सम्पन्न प्रतियोगितामा सुमन तामाङ प्रथम र राजन पिया दोस्रो स्थान हात पारेका छन् । उनीहरु दुवै जना यसै वर्ष हुने एसिया प्यासिफिक अटो जिमखाना च्याम्पियनसिपमा सहभागी हुनेछन् ।
नेपालभरका ड्राइभर्सहरू सहभागी खुल्ला प्रतियोगितामा विजेतालाई बागमती खेलकुद विकास परिषद्का सदस्य सचिव सूर्यलाल भण्डारी, उद्यमी अरुणराज सुमार्गी, नेपाल खेलकुद महासंघका महासचिव धरम कुमार लामा, नेपाल अटोमोबाइल एसोसिएसनका उपाध्यक्ष अनिल कुमार बराल तथा कोशी अटोमोबाइल एसोसिएसनका अध्यक्ष प्रकाश कपुरी लगायतले पुरस्कृत गरेका थिए ।
हेटौँडामै पहिलोपटक डिजाइन गरिएको कलात्मक ट्रयाकमा सहभागी हुन सबै उमेर समूहका ड्राइभरहरू सहभागी थिए । उनीहरूको ड्राइभिङ स्किल, उमेर अवस्था, शारीरिक क्षमता र स्वास्थ्य अवस्था समेतको विश्लेषण गरी फाइनल राउन्डमा २० जना ड्राइभर्स र नेभिगेटरहरुलाई समावेश गरिएको थियो ।
यसअघि गरिएको ओरिएन्टेसनमा राउन्डमा भने १८ ड्राइभर्स र १६ को–ड्राइभर सहभागी थिए ।
बागमती प्रदेश संघले पहिलोपटक तथा नासा नेपालले काठमाडौँ बाहिर पहिलोपटक आयोजना गरिएको सो प्रतियोगिता अन्तर्राष्ट्रिय अटोमोबाइल फेडरेसन एफआईएका स्पोर्ट्स ग्रान्ट, बागमती खेलकुद विकास परिषद् र भरतपुर महानगरको विशेष सहयोग तथा पोखरा राइडर्स क्लबको प्राविधिक सहयोगमा सम्पन्न भएको हो ।
