सेमिफाइनलमा न्यू डायमन्ड र एभरेस्ट भिड्ने
काठमाडौँ। आठौँ आरबीबी एनभीए महिला तथा पुरुष भलिबल च्याम्पियनसिपको महिलातर्फ फाइनल प्रवेशका लागि न्यू डायमन्ड स्पोर्टस क्लब र एभरेस्ट भलिबल भिड्ने छन्।
त्रिपुरेश्वरस्थित राष्ट्रिय खेलकुद परिषद् (राखेप)को कभर्ड हलमा बुधबार सम्पन्न समूह चरणको अन्तिम खेलमा मधेश प्रदेशलाई ३-० को सोझो सेटमा पराजित गर्दै न्यू डायमन्ड उपाधिनजिक पुगेको हो। पहिलो सेट २५-१० ले जितेको न्यू डायमन्डले त्यसपछिका दुई सेट २५-६ र २५-८ ले आफ्नो पक्षमा पार्यो।
जितसँगै समूह ‘बी’ को न्यू डायमन्डले २ खेलमा ६ अंक जोड्यो। दुवै खेलमा पराजित मधेश भने प्रतियोगिताबाट बाहिरिएको छ।
बुधबार नै सम्पन्न विभागीय डर्बीमा त्रिभुवन आर्मी क्लबलाई ३-० को साझो सेटमा हराउँदै पुलिस क्लब सेमिमफाइन प्रवेश गरेको छ।
पुलिसले खेल २५-१५ २५-१६, २५-१९ ले जितेको थियो।
जितसँगै समूह ‘ए’ को विजेता बनेको पुलिसले ३ खेलमा ८ अकं जोड्यो। पराजित आर्मी ३ खेलमा ३ अंक जोड्दै प्रतियोगिताबाट बाहिरियो। पुलिसले फाइनल प्रवेशका लागि विभागीय क्लब एपीएफसँग खेल्ने छ।
यो समूहमा ७ अंक जोडेको एभरेस्ट भलिबल क्लब उपविजेताका रूपमा सेमिफाइनल प्रवेश गरेको छ। एभरेस्टले फाइनल प्रवेशका लागि न्यू डाइमन्डसँग खेल्ने छ।
