एभरेस्टसँग आर्मी पराजित

काठमाडौँ- एभरेस्ट भलिबल क्लबले आठौँ आरबीबी एनभीए महिला तथा पुरुष भलिबल च्याम्पियनसिपको महिलातर्फ विभागीय टोली त्रिभुवन आर्मी क्लबलाई पराजित गरेको छ।

त्रिपुरेश्वरस्थित राष्ट्रिय खेलकुद परिरषद् (राखेप) को कभर्ड हलमा सोमबार समपन्न पहिलो खेलमा एभरेस्टले आर्मीलाई ३-१ को सेटमा पराजित गरेको हो।
जारी प्रतियोगितामा एभरेस्टको यो लगातार दोस्रो जित हो। एभरेस्टले २ खेलबाट ६ अंक जोडेको छ।

पहिलो खेलमा उसले कर्णाली प्रदेशलाई पराजित गरेको थियो। सोमबार पहिलो सेट २४-२६ ले गुमाएको एभरेस्टले त्यसपछिका तीन सेटमा पुनरागमन गरेको थियो। 

दोस्रो सेट २५-१७ ले जितेको एभरेस्टले तेस्रो सेट २५-१९ ले आफ्नो पक्षमा बनायो। चौथो सेटमा पनि एभरेस्टले २५-२२ को जित निकाल्यो।