प्रिन्स र प्रफुल उपाधिका लागि भिड्ने 

काठमाडौं । एपीएफका प्रिन्स दाहाल र ललितपुरका प्रफुल महर्जन पुन : एक पटक लि–निङ्ग १३ औं पुष्पलाल स्मृती राष्ट्रिय र्याङ्किङ्ग ब्याडमिन्टन प्रतियोगिताको उपाधिका लागि भिड्ने भएका छन् ।

पुष्पलाल स्मृतीको अघिल्लो संस्करणमा प्रफुललाई पछि पारेका प्रिन्स तेश्रो प्रधानमन्त्री कपमा प्रफुलसंग पराजित भएका थिए । त्यस यता ललितपुर जिल्ला ब्याडमिन्टन संघले आयोजना गरेको दोश्रो मेयर कप र स्पोर्टस् हवद्वारा आयोजना गरिएको प्रथम प्रकाश दाहाल स्मृती राष्ट्रिय ब्याडमिन्टन प्रतियोगितामा प्रफुललाई पराजित गर्दै प्रिन्सले उपाधि जितेका थिए ।

शुक्रबार भएको शीर्ष ८ पुरुष एकल क्वाटरफाईनल खेलमा प्रिन्सले एपीएफकै देवराज रानालाई २१–७, २–१२ ले पराजित गर्दै फाईनलमा प्रफुलसंगको भेट पक्का गरेका हुन् । प्रफुलले नेपाल पुलिस क्लबका सुनिल जोशीलाई २१–१४, २१–१३ ले पराजित गर्दै फाईनल यात्रा तय गरेका हुन् ।

नेकपा एमालेको भातृसंस्था नेपाल खेलकुद महासंघ अन्तरगतको राष्ट्रिय ब्याडमिन्टन संघ, नेपालको आयोजनामा भएको प्रतियोगिताको महिला एकलको प्रतिस्पर्धामा ललितपुरकी रसिला महर्जनले नेपाल पुलिस क्लबकी निता लम्साललाई पराजित गर्दै फाईनल प्रवेश गरिन् ।

फाईनल प्रवेश गर्ने क्रममा रसिलाले निला माथि २१–१६, २१–१६ को समान अन्तरको जित निकालेकी हुन् । अब रसिलाले उपाधिका लागि भोजपुरकी नङ्गशल तामाङ्गसंग प्रतिस्पर्धा गर्नेछिन् । नङ्गशलले ११ औं र १२ औं संस्करणकी बिजेता आर्मीकी अनुमाया राईलाई २१–१४, २४–२२ को जित निकाल्दै फाईनलमा रसिलासंगको भेट पक्का गरेकी हुन् ।

यसैगरि मास्टर्स ४५ बर्ष माथिको युगल प्रतिस्पर्धामा रिभाईभका सुक्र पाख्रिन र भिम बहादुर थापाको जोडी तथा पिस फिटनेश सेन्टरका संजय कपाली र अनिल थामसुहाङ्गको जोडी उपाधिका लागि भिड्ने भएका छन् । सुक्र र भिमको जोडीले ललितपुरका मधु गुरुङ्ग र प्रकास राईको जोडीलाई १०–२१, २१–१६, २१–१८ ले तथा संजय र अनिलको जोडीले पाँचथरका दीपक आङ्गदम्बे र कुश्माका प्रेम गुरुङ्गको जोडीलाई २२–२०, २१–८ ले पराजित गर्दै फाईनल प्रवेश गरेका हुन् ।

मास्टर्स ५५ बर्ष माथिको प्रतिस्पर्धामा पिस फिटनेश सेन्टरका गणेश राई र कर्ण बहादुर शाहीको जोडीले फिटनेश पार्कका पुर्ण जोशी र उमेश केसीको जोडीलाई २१–१९, २६–२४ ले पराजित गर्दै उपाधिका लागि गुल्मीका राम गुरुङ्ग र खगेन्द्र रेग्मीको जोडीसंगको भेट पक्का गरेका छन् ।

गुरुङ्ग र राईको जोडीले ललितपुरका दिल कन्दङ्गवा र एपीएफका प्रेम श्रेष्ठको जोडीलाई २०–२२, २१–१८, २१–७ ले पराजित गर्दै उपाधि नजिक पुगेका हुन् ।