पुष्पलाल ब्याडमिन्टन : प्रिन्स र प्रफुल सेमिफाइनलमा

काठमाडौं । राजधानीमा जारी लि-निङ्ग १३ औं पुष्पलाल स्मृती राष्ट्रिय र्याङ्किङ्ग ब्याडमिन्टन प्रतियोगिताको शीर्ष ८ बरियताबीचको सेमिफाईनल समिकरण पुरा भएको छ ।

पुरुष एकलतर्फ समूह ए बाट बिजेताको रुपमा एपीएफका प्रिन्स दाहाल र उपबिजेताको रुपमा नेपाल पुलिसका सुनिल जोशी तथा समूह बीबाट बिजेताको रुपमा ललितपुरका प्रफुल महर्जन र उपबिजेताको रुपमा एपीएफका देवराज रानाले सेमिफाईलनमा स्थान बनाए ।

महिलातर्फ समूह एबाट ललितपुरकी रशिला महर्जन समूह बिजेता र आर्मीकी अनुमाया राई उपबिजेता तथा समूह बीबाट भोजपुरकी नङ्गशल तामाङ्ग समूह बिजेता र नेपाल पुलिसकी निता लम्साल समूह उपबिजेताको रुपमा सेमिफाईनल प्रवेश गरेका छन् ।

नेकपा एमालेको भातृ संस्था नेपाल खेलकुद महासंघ अन्तरगतको राष्ट्रिय ब्याडमिन्टन संघ, नेपालको आयोजनामा भएको प्रतियोगिताको शीर्ष ८ को पुरुष एकल तर्फको बुधबार अन्तिम खेलमा प्रिन्सले पुलिसका जीवन आचार्यलाई २१–१८, २१–१३ ले पराजित गर्दै सेमिफाइनलमा समूह बिजेता बनेका हुन् ।

प्रिन्सले लिगका तीनै खेलमा जित हात पारे । यस्तै अर्को खेलमा नेपाल पुलिसका सुनिल जोशीले एपीएफका बिजित थापा मगरलाई २१–१०, १७–२१, २१–१८ ले पराजित गर्दै लिगमा दुई जितका साथ समूह उपबिजेता बने ।

यस्तै पुरुषतर्फको समूह बीबाट ललितपुरका प्रफुल महर्जनले नेपाल पुलिसका बिष्णु कटुवाललाई २१–१५, २१–१७ ले पराजित गरे । उनले लिगमा आफ्ना तीनै खेलमा बिजय हात पार्दै समूह बिजेता बनेका हुन् । समूह उपबिजेता देवराज रानाले नेपाल पुलिसका दीपक बोहरालाई २१–१२, २१–१५ ले पराजित गरे । रानाले लिगका दुई खेलमा जित हात पारे ।

चन्द्रागिरीस्थित महांकाल ब्याडमिन्टन क्लबको कभर्डहलमा भएको प्रतियोगिताको महिला एकलतर्फ समूह एको अन्तिम लिग खेलमा ललितपुरकी रसिलाले आर्मीकी अनुमाया राईलाई १७–२१, २१–१६, २१–१२ ले पराजित गर्दै समूह बिजेताको रुपमा सेमिफाईनमा स्थान बनाएकी हुन् । प्रतियोगितामा पराजित भएता पनि समूह उपबिजेताको रुपमा अनुले पनि सेमिफाईनलमा स्थान पक्का गरिन् । यसै समूहको अर्को खेलमा मोरङ्गकी सिमा राजबंशीले सर्लाहीकी निकिता लामालाई २१–८, २१–९ ले पराजित गरिन् ।

यसैगरि समूह बीको खेलमा भोजपुरकी नङ्गशल तामाङ्गले लिगको अन्तिम खेलमा आर्मीकी अमिता गिरीलाई २१–१०, २१–१३ ले पराजित गर्दै समूह बिजेताको रुपमा सेमिफाईनलमा स्थान बनाईन् । तामाङ्गले आफ्नो समूहको तीनै खेलमा जित हात पारेकी थिईन् । 

यसै समूहको अर्को खेलमा पुलिसकी निता लम्सालले एपीएफकी शोभा गौचनमाथि २१–११, २१–११ को समान अन्तरले जीत हात पारिन् । लम्सालले लिगमा दुई जितका साथ उपबिजेताको रुपमा सेमिफाईनलमा स्थान बनाएकी छिन् ।