पाँचथरमा कोशी प्रदेश स्तरीय ब्याडमिन्टन हुने

पाँचथर । पाँचथरमा कोशी प्रदेश स्तरीय ब्याडमिन्टन प्रतियोगिता हुने भएको छ । 

जिल्ला खेलकुद विकास समिति पाँचथरको समन्वय र कोशी प्रदेश खेलकुद  विकास बोर्डको आयोजनामा फागुन ९ देखि ११ गतेसम्म प्रतियोगिता हुने पक्का भएको हो । 

प्रदेश स्तरीय ब्याडमिन्टन प्रतियोगिता सहित खुल्ला भेट्रान्स प्रतियोगिता पनि हुने छ । 

मंगलबार खेलकुद विकास समिति पाँचथरले पत्रकार सम्मेलनको आयोजना गरेर प्रतियोगिताको मिति सार्वजनीक गरेको हो । 

प्रतियोगिताका खेलहरु जिल्ला समन्वय समिती पाँचथरको कवर्डहलमा संचालन हुनेछ । प्रतियोगितामा मेन्स डबल, मेन्स सिंगल, विमेन डबल, विमेन सिंगल र मिक्स डबलका खेलहरु हुने जिल्ला खेलकुद विकास समिति पाँचथरका अध्यक्ष सन्तोष मोक्तानले जानकारी दिए ।

प्रतियोगितामा कोशी प्रदेशका १४ वटा जिल्लाको  ६८ जना खेलाडीहरुको सहभागिता रहने छ ।

प्रदेश स्तरीय ब्याडमिन्टन प्रतियोगिताको हरेक विधाका बिजेताले ट्रफी, मेडल सहित नगद २० हजार, १० हजार र ५ हजार  प्राप्त गर्नेछन् ।  खुल्ला भेट्रान्स प्रतियोगिता तर्फ ४५ वर्ष माथि र दुई जना खेलाडीको उमेर जोड्दा १०० वर्ष माथि गरि दुई विधाको खेल हुने आयोजकले जनाएका छन् । खुल्ला भेट्रान्स प्रतियोगिता तर्फका बिजेताले ३० हजार र उपबिजेताले १५ हजार प्राप्त गर्ने छन् । 

आगामी फाल्गुन २४ गते देखि हेटौडामा हुने अन्तर प्रदेश स्तरीय प्रतियोगिताको खेलाडी छनोट समेत यसै प्रतियोगिताबाट गरिने मोक्तानले जानकारी दिए । प्रतियोगितालाई फिदिम नगरपालिकाले समेत आर्थिक सहयोग गरेको छ ।

प्रतियोगितामा प्राबिधिक सहयोग जिल्ला ब्याटमिन्टन संघले गर्नेछ । प्रतियोगिता सम्पन्न गर्न १८ लाख खर्च हुने आयोजकले जनाएको छ ।