आर्मीको जितले न्यु डायमन्ड सेमिफाइनलमा 

पोखरा । त्रिभुवन आर्मी क्लबको महिला टोलीले टाइगर कप भलिबलमा जित निकाल्दा चन्द्रागिरी न्यु डायमन्ड सेमिफाइनलमा पुगेको छ । 

मंगलबार प्रतियोगिता अन्तर्गत समूह ‘बी’ को खेलमा भारतको हरियाणालाई  आर्मीले ३–२ सेटले हराएको हो । 

पोखरा रंगशालामा भएको खेलमा आर्मीले पहिलो सेट २५–२२ ले जितेको थियो । त्यसपछि आर्मीले लगातार दुई सेट गुमाउन पुग्यो । 

हरियाणाले दोस्रो सेटमा २५–२० को जित निकाल्दा तेस्रो सेटमा २५–१८ को जित निकाल्न सफल भयो । आर्मीले चौथो सेटमा २५–१७ को जित निकाल्दा पाँचौ सेटमा १५–१२ को जित निकाल्न सफल भयो । 

यो जितसँगै आर्मीले २ खेलमा २ अंक जोडेको छ । हरियाणाले १ अंक जोडेको छ । यता ३ अंक जोडेको न्यु डायमन्ड सेमिफाइनलमा पुगेको छ । 

प्रतियोगिताको महिला र पुरुष दुवै तर्फको विजेता टोलीले ५ लाख ५५ हजार ५ सय ५५ रुपैया पुरस्कार पाउनेछ । त्यस्तै दोस्रो हुनेले २ लाख ५५ हजार ५ सय ५५  पाउँदा तेस्रो हुनेले १ लाख २५ हजार ५ सय ५५ रुपैयाँ पाउनेछ ।