काठमाडौं । सेनाका अभय महरा दोश्रो मेयरकप राष्ट्रिय ब्याडमिन्टन प्रतियोगिताको पुरुष एकल र यु-१७ दुवैतर्फ अन्तिम आठमा प्रवेश गरेका छन् ।
बिहीबार भएको खेलमा अभयले पुरुष एकलतर्फ एपीएफका क्षितिज खनाललाई २१–१५, २१–१३ ले र यु १७ मा नेपाल पुलिस स्कुलका इशान गिरीलाई २१–७, २१–७ को समान अन्तरले पराजित गर्दै अन्तिम आठमा स्थान बनाउन सफल भएका हुन् ।
यस्तै अन्तिम आठमा स्थान बनाउने क्रममा पुरुष एकलतर्फ सेनाका प्रफुल महर्जनले एपीएफका अमन महर्जनलाई २१–८, २१–४ ले तथा एपीएफका प्रिन्स दाहालले युनिटी ब्याडमिन्टन एकेडेमीका सुनिल कार्कीलाई २१–१५, २१–९ ले पराजित गरेका थिए ।
ललितपुर जिल्ला ब्याडमिन्टन संघको आयोजना तथा बालकुमारी रिमिक्स क्लबको सहआयोजनामा भएको प्रतियोगिताको अन्तिम आठमा प्रवेश गर्ने अन्यमा नेपाल पुलिसका बिष्णु कटुवाल, एपीएफका देव राना र रोशन साउद, सेनाका डेभिड थापा मगर र नेपाल पुलिसका जीवन आचार्य रहेका छन् ।
कटुवालले एपीएफका सुजन थापालाई २१–११, २१–११ को समान अन्तरमा, देव रानाले एपिएफका अरुण अधिकारीलाई २१–२३, २१–१५, २१–१५, रोशन साउदले सेनाका सुविन श्रेष्ठ बीलाई २१–१७, १७–२१, २१–९, डेभिडले एपीएफका अनिल मल्ललाई २१–११, २१–६, जीवनले एपीएफका भोज बहादुर गुरुङ्गलाई २१–१५, २२–२० ले पराजित गरेका थिए ।
ललितपुर महानगरपालिकाको मुख्य प्रायोजनमा भएको प्रतियोगिताको यु-१७ तर्फ सेनाका सुविन श्रेष्ठ बीले एपीएफका प्रदीप सोतीलाई २१–१३, २१–१२ ले, सेनाका सुप्रिम पन्थले सुर्खेतका रमेश कामीलाई २१–८, २१–७ ले, नेपालगंजका राजेश बिसीले सेनाका सुदेश राजकोटीलाई २१–१८, २३–२१ ले, गुल्मीका जेनिश शेरचनले देवीनगरका सक्षम ढकाललाई २१–५, १२–२१, २१–१६ ले, सेनाका सुविन श्रेष्ठ एले सुर्खेतका हिमाल थापा मगरलाई २१–१८, २१–१६ ले, एपीएफका अरुण अधिकारीले सेनाका सौर्य महर्जनलाई २१–१९, २१–१८ ले र सेनाका कविर केसीले दीपक ब्याडमिन्टन एकेडेमीका डियोन भण्डारीलाई २१–७, २१–५ ले पराजित गर्दै अन्तिम आठमा स्थान पक्का गरेका छन् ।
यस्तै शीर्ष २० बरियता बाहेकको पुरुष युगलतर्फ बालकुमारी रिमिक्स क्लबका दिप्रिस मुनी बज्राचार्य र शान्ता डङ्गोलको जोडीले दथुलँँका रत्न बज्राचार्य र सुजन शाक्यको जोडीलाई २१–११, २६–२४ ले र सेनाका विवेक चौधरी र डेभिड थापा मगरको जोडीले जोरपाटी ब्याडमिन्टनका लोक लामा र लक्ष्मण सुनुवारको जोडीलाई २१–१३, २१–१२ ले पराजित गर्दै अन्तिम आठको यात्रा तय गरेका छन् ।
