काठमाडौं । अत्तिरिक्त समयमा जित निकाल्दै कीर्तिपुर ‘ए’ दोश्रो नखिपोट खुला बास्केटबल प्रतियोगिताको पुरुषमा सेमिफाइनलमा प्रवेश गरेको छ ।
शनिबार कीर्तिपुर ‘ए’ ले गोल्डेनगेटलाई १०७–१०२ ले पराजित गर्यो । कीर्तिपुर ‘ए’ का जयदीपले ३७ स्कोर गरे ।
निर्धारित समयको खेल ९३–९३ को बराबरीमा सकिएको थियो । अत्तिरिक्त समयमा कीर्तिपुर ‘ए’ ले १४–९ को अग्रता बनाउदै जित सुनिश्चित गर्यो ।
नखिपोट युथ क्लबद्वारा आयोजित प्रतियोगितामा नेपाल आर्मी र टाइम्स बास्केटबल क्लब पनि सेमिफाइनलमा स्थान सुरक्षित गर्न सफल रहे ।
आर्मीले हाउन्ड्सलाई ९४–७२ ले हरायो । आर्मीका निकेश मगरले १५ अंक जोडे । आर्मीले सुरुका ३ क्वाटरमा २०–११, ३४–१४ र २४–२३ को प्रदर्शन गर्दै जितको आधार खडा गरेको थियो । चौथो तथा अन्तिम क्वाटरमा हाउन्ड्स २४–१६ ले अगाडि रहेपनि जितका लागि पर्याप्त भएन ।
टाइम्सले बौद्ध ‘ए’ लाई ११९–९७ ले पाखा लगायो । टाइम्सका लागि मोविन्द्र भण्डारीले २९ अंक बटुले । पहिलो क्वाटरमा ३०–२७ को अग्रता लिएको टाइम्सले अन्तिमसम्म अग्रतालाई कायम राख्यो ।
टाइम्सले दोश्रोमा ३१–२७, तेश्रोमा २७–२६ र चौथोमा ३१–१७ को अग्रता लिदै जित अन्तर फराकिलो बनायो ।
