काठमाडौं । अखिल नेपाल फुटबल संघ (एन्फा) को नेतृत्वमा छन्, कर्माछिरिङ शेर्पा ।
नेपाली फुटबलको आमुल परिवर्तनको नारा सहित फुटबल हाक्न आएका शेर्पा यतिबेला धेरै ठुलो चुनौती र सम्भावनाले घेरिएका छन् । करिब पाँच बर्ष आन्तरिक शक्ति संघर्षको चपेटामा परेको नेपाली फुटबललाई दक्षिण एसिया हुँदै एसियाको बलियो शक्तिको रुपमा उभ्याउनुपर्ने चुनौती उनका सामु छ ।
फुटलब संघ भित्र रहेका विभिन्न स्वार्थ समूहबाट नेपाली फुटबललाई बाहिर निकाल्दै नेपाली फुटबलको सफलताको कथा लेख्ने अवसर समेत उनलाई प्राप्त छ । कार्यकालको सुरुवाती ९ महिना आलोचनाबाट घेरिएका उनी आफ्नो ४ बर्षे कार्यकालमा नेपाललाई साफको च्याम्पियन बनाउने दाबी गर्छन् ।
नेपाली फुटबलको नक्सानै बदल्ने दाबी सहित एन्फा भित्रिएका शेर्पाले सुरुवाती ८ महिनामा के के काम गरे ? फुटबल विकासमा उनको योजना के छ ? यिनै बिषयमा खेलपाटीका लागि हिम बिक्रम केसीले गरेको कुराकानीको सम्पादित अंश ।
♦ कार्यकालको सुरुवाती ८ महिनाको समिक्षा कसरी गर्नुहुन्छ ?
विधि विधान बनाउने कार्य अन्तिम चरणमा पुगेका छ । साधारण सभाबाट नियमावली पारित भएका छन् । नियमावलीमा टेकेर कार्यविधि बनाउन पर्नेछ । जनवरीसम्म कार्यविधि बनाउने गरि काम अघि बढेको छ ।
प्रदेश नम्बर २ मा महिला फुटबलको नयाँ अध्याय कोर्न सफल भएका छौ । महिलामा यु–१५ र यु–१९ मा सहभागी भयौ । साफ, एएफसी र ओलम्पिक छनोटमा प्रतिस्पर्धा गर्यौ । साफ नेपालमा आयोजना गर्दैछौ । त्यसको तयारीमा समेत जुटेका छौ ।
विगत ४–५ वर्ष नभएको लिग सुरु गर्न सफल भएका छौँ । लिगको बिषयलाई लिएर जुन शंका आशंका ब्यक्त भएका थिए, ति आरोपहरु प्रमाणीत भएनन् । लिग नभएर नेपाली फुटबल मरेको थियो । कोमामा गएको अवस्था थियो । कोमामा गएको फुटबललाई जोगाउन रेलिगेसन विनाको लिग गर्यौं । लिग खेल्न क्लबहरु तयार थिएनन् । आर्थिक समस्याको कारण देखाएका थिए । खेलाडी अभाव थियो । क्लबहरुको आत्मविश्वास बढाउन लिग जसरी पनि गर्नुपर्ने बाध्यता थियो । लिग अन्तिम चरणमा पुगेको छ । अर्काे बर्षबाट सबै लिग रेलिगेसन सहितको गर्ने तयारीमा छौ ।
ग्रासरुट कार्यक्रम सफल भएको छ । किनकी यसको माग बढेको छ । यसको अनुगमन गर्ने काम पनि भैरहेको छ ।
हामीसंग प्रशिक्षक र रेफ्रीको अभाव छ । सात प्रदेशमै प्रशिक्षकको कार्यक्रम सञ्चालन गरेका छौ । आधारभुत एन्फा लाईसेन्स प्रशिक्षणको सूरुवात गरेका छौ । अब एन्फा लाईसेन्स लिएर मात्र सी लाईसेन्सका लागि आवेदन दिन पाउनेछ । अब बर्षमा तीन सी लाईसेन्स, दुई बी र एक पटक ए लाईसेन्सको कोर्ष सहितको तालिकामा सार्वजनीक गर्नेछौ ।
रेफ्रीको सम्बन्धमा लिग सम्पन्न भएपछि आधारभुत कोर्षको तालिम सुरु गछौ । आगामी बर्षबाट स्कुल लिग, जिल्ला लिग, प्रदेश लिग, एन्फा प्रेसिडेन्ट लिग, राष्ट्रिय लिग सहित सहिद स्मारक लिग गर्न रेफ्रिको अभाव छ । त्यसैले क्षमता वृद्विलाई ध्यानमा राखेर क्यालेन्डर प्रकाशित गर्ने आन्तरिक तयारीमा छौ । अब आउने कार्यसमिति बैठकबाट बजेट शीर्षक सहित लिपिबद्ध ढंगले नकआउट प्रतियोगिताको क्यालेन्डर प्रकाशित हुनेछ । अर्को बर्ष हुने सबै कार्यक्रमलाई साधारण सभाबाट अनुमोदन गराएर प्रकाशन गर्नेछौ ।
महिला लिग सक्यौ । छोटो समयको विद्यालय प्रतियोगिता सम्पन्न गरेका छौ । उमेर समुहका कार्यक्रमहरु छोटे समयको भएपनि सम्पन्न गरेका छौ ।
लिग सम्पन्न गरेलगत्तै बर्षभरीको क्यालेन्डर प्रकाशित गछौँ । क्लबहरुले पनि त्यसमा समर्थन जनाएका छन्, जिल्ला समेत सहमत छन् ।
अव आउने बर्ष चार वटा एकेडेमी सञ्चानल गर्नेछौँ । रौतहटको महिला, बुटबल, धरान र काठमाडौँलाई पुर्नसंरचना सहित सञ्चालनमा ल्याउने तयारी गरेका छौ । छनोटमा क्रुटी नहोस भनेर अहिले देखि काम गरिरहेका छौ । छनोटका खेलाडी ए डिभिजन लिगमा बेन्चमा बस्न पर्ने र छानेका खेलाडी राष्ट्रिय टिममा नपर्ने बिडम्बनाको अन्त्य गर्नेछौ ।
चार देखि सात ठाउँमा विशेष प्रशिक्षणको थालनी गर्दैछौ । ४५ वटा फुटबल संघ भएको ठाउँमा नियमति अभ्यास सुरु गर्दैछौ । राष्ट्रिय स्तरका कोचले खेल हुने स्थानको अनुगमन गर्ने, नजरमा राख्ने काम गछौ । मार्किङ गरेका खेलाडीलाई फेरि मेडिकल टेष्ट गरेर छनोट गर्ने योजना बनाएका छौ । फुटबललाई ब्यवस्थित ढंगले सञ्चालन गर्न केही समय लाग्छ तर धेरै कामको योजना बन्दैछन् ।
♦ फुटबल संघमा फिफा, एएफसीका अनुदान बढेका छन् । नीजि क्षेत्र फुटबलमा काम गर्न आतुर छ, तर तपाईले जुन गति र प्रभावका साथ फुटबलको काम हुन पर्ने हो, त्यो गर्न सक्नु भएन भन्ने आरोप छ नि ?
अनुदान बढेको सन्दर्भमा म खुसी छु । अनुदान हामी आएर बढेको हैन । फिफाको अुनदान भनेको आम्दानी अनुसार बढ्ने हो । म के कुरा स्पष्ट पार्न चाहन्छु भने हिजो २०–२२ बर्ष पहिलो तीन, पाँच लाख डलरमा स्टेडियम बन्न सक्थ्यो । तर तीन–चार वटा गोल प्रोजेक्ट आउदाँ ३ वटा टेक्निकल सेन्टर बाहेक देखिने काम केही भएन । मेरो भनाइ के हो भने, अहिले महँंगी बढेको छ । हिजो डन्डिको भाउ ९–१० थियो भने अहिले ८० देखि लिएर ११०–१२० पुगेको छ ।
तर हामी ईमान्दारीताका साथ फिफाको अनुदान पारदर्शितामा लैजान्छौ । हामीले साँढे २२ लाख डलर पाएका थियौ, पहिलो पटक हामीले राखेप, मन्त्रालयबाट स्विकृत लिएका छौ । हामीले सरकारी निकायलाई देखाएर काम गर्न थालेका छौ । कार्यसमितिमा व्यापक छलफल गरेर अनुदान अनुमोदन गर्ने काम गर्न थालेका छौ ।
अनुदान अनुसार हामीले त्यही काम अघि बढाउने योजना बनाएका छौ । फिफाबाट पुर्वाधार निर्माणमा आउने खर्च चार बर्षमा पुग्ने भएमा हामीले ४५ जिल्लामा ट्रेनिङ सेन्टर बनाउने सोचेका छौ । टेक्निकल सेन्टर वृद्वि गराउने सोचेका छौ । पुर्वाधार र विकासमा अधिकतम सो रकम खर्च गर्ने हाम्रो लक्ष्य हो । एएफसीले प्रत्येक बर्ष १२ लाख डलर दिने भनेको छ । रकम धेरै बढेर आउँदैछ । सो बिषयमा म पत्रकार सम्मेलन गरेरै बोल्नेछु । फिफाबाट आउने बजेट डिसेम्बरको अन्तिम वा जनवरीमा थाहा हुन्छ । त्यसपछि पत्रकार सम्मेलन गरेर जानकारी गराउनेछौ ।
♦ तपाई फुटबलमा आमुल परिवर्तनको नारा लिएर आउनु भयो तर चार बर्षे कार्यकालको एक चौथाई समय बिताउदाँ नेपाली फुटबलले तपाईको उपस्थितीको महशुश गर्न पाएन नि ?
एउटा पक्षलाई उपस्थिति नभएको देखिन सक्छ । फुटबलाई माया गर्ने इमान्दार मान्छे जसले तटस्थ भएर हेर्छ उसले मेरो कामलाई राम्रो भनेको छ । मलाई चिन्ने नचिन्ने मान्छेले अहिले फुटबलमा राम्रो सुनिरहेको छु भन्छ । राम्रो भईरहेको छ भन्छ ।
एक पक्षको काम विरोध नै गर्ने हुन्छ । नभएको कुरालाई बनाएर गर्ने पनि हुन्छ । यहाँ एक थरी मान्छे छन्, जसले विकास गर्ने र राम्रो काममा बाधा पुर्र्याउने गरेका छन् । म त्यस्ता मान्छेसंग डराउदिन । म अगाडी बढ्छु । फुटबलको ४ वर्षको कार्यकाल मेरो जिम्मेवारीमा छ । कार्यकाल सफल बनाउन हाम्रो टिमनै लागेको छ । बादविवाद हुन्छ, छलफल हुन्छ । मतभेद नि हुन्छ तर मन भेद हुन हामी दिने छैनौ । हामी प्रजातान्त्रिक र पारदर्शी संस्कृतीको कुरा गरिरहेका छौ । सामुहिक नेतृत्वको बिषय हामी जादैछौ । तर हिजोको जुन संस्कार र वातावरणबाट आएका मानिस छौ, परिवर्तन हुन समय लाग्छ । हामी ईमान्दारीताकासाथ लागिरहेका छौ ।
♦ एन्फाभित्र एक प्रकारको तानाशाह र निरंकुशताको आरोप लगाउँदै तत्कालिन नेतृत्वको विरोध गर्नुभयो । तर एन्फामा एउटा राजा ढालेपछि धेरै छोटे राजाहरु जन्मिए भन्ने चर्चा छ । धेरै स्वार्थ समूहको एन्फामा बिगबिगी भयो भनेर फुटबल जानकारहरु भन्न थालेका छन्, यसमा तपाईको टिप्पणी ?
हामी पुरानै संस्कृतिबाट आएका छौ । तर, हामी नयाँ युगको सिर्जना गर्न आएका हौँ । कमिकमजोरी साथीहरुमा हुन सक्छ तर जानेर गल्ती कसैले गरेको छैन ।
♦ तत्कालिन अध्यक्ष गणेश थापालाई नेतृत्वबाट हटाएर एन्फाभित्र धेरै स्वार्थ समूहको झुण्ड पस्यो भन्ने बिषयसंग तपाई कत्तिको सहमत हुनुहुन्छ ?
स्वार्थ समूहबाट भन्दा पनि हिजो फुटबल संघ सञ्चालन गरेका मान्छेनै अहिले एन्फामा छन् । सबै प्रतिबद्ध भएर परिवर्तन गर्नुपर्छ भनेर आएका हौ । हिजो प्रजातन्त्र, पञ्चायत कालमा पनि त्यहि जनता हो । प्रजातन्त्र आइसकेपछि पनि त्यहि जनता हो । संस्कारमा कति परिवर्तन भयो भन्ने कुराको अर्थ राख्छ ।
समयले परिवर्तन महसुस गरेर नयाँ परिवर्तन आएको छ । म सबैलाई भन्न चाहन्छु, समय आएपछि सबै ठिक हुन्छ । समय चहि कुर्न सक्नुपर्याे । ब्यक्तिगत स्वार्थ हुनसक्छ, तर हामी सामुहिक नेतृत्वको कुरा गरिरहेको छौँ । सामुहिक नेतृत्व कसरी गर्नुपर्छ भनेर छलफल गरिरहेका छौँ ।
सात महिनामा ४ पटक कार्य समितिको बैठक बस्यो, यसलाई तपाई के भन्नुहुन्छ ? अझै पनि हामीले साथीहरुका चित्त बुझाउन सकिरहेका छैनौं । हामीले नियमावली बनायौ तर कार्यविधि पनि चाहिने रै छ भनेर बल्ल बुझ्दैछौ । एउटा प्रक्रियामा जान समय लाग्छ, हाम्रा साथीलाई अहिले गाह्रो भईरहेको छ । हामी सबै प्रणालीलाई अनलाईन गर्दैछौ । सबै कुरा स्मार्ट अनलाईनमा लैजादैछौ । कामहरु अघि बढेका छन् ।
♦ स्वार्थ समूहबाट घेरिदाँ काम गर्न कत्तिको समस्या भईरहेको छ ?
कसैको के होला, कसैको के तर हामी बुझाउन सक्छौ । नेतृत्वमा बसेको मान्छेले बुझाउन सक्नुपर्छ । कतिपय साथीले ब्यक्तिगत स्वार्थ भन्दापनि आ आफ्नो कुरा राख्न सक्छन् । हामीले सम्झाउन सक्न पर्छ । विधि विधान अनुसार अघि बढ्ने बिषयमा सबै एकमत हुनपर्छ ।
व्यक्तिगत भन्दा पनि हाम्रो सबैको साझा उदेश्य भनेको फुटबलको विकास हो । काम गर्दा गाह्रो हुन्छ । तर भारी बोकेपछि ठाउँमा पुर्र्याउन पर्यो । सबै प्रकारका साथीलाई मिलाएर लैजानुपर्ने दायित्व नेतृत्वको हुन्छ । मतभेद हुन्छ, मन भेद अहिलेसम्म भएको छैन ।
♦ यो एन्फाको अध्यक्षको कुर्सी कत्तिको गाह्रो हुँदो रहेछ काम गर्न ?
मलाई गाह्रो सारो भन्दा पनि चुनौतीको रुपमा लिएको छु । यसलाई अवसरको रुपमा प्रयोग गरेको छु ।
अवसरलाई नेपाली फुटबलको विकासका लागि प्रयोग गर्न सक्यो भने नेपाली फुटबलको विकास हुन्छ । एउटा प्रणाली बस्छ । तर गाह्रो सारो परिरहन्छ । यसलाई चिर्दै अघि बढ्न पर्छ ।
♦ फुटबल राजनीतिमा आउन अघिल्लो नेतृत्वलाई तपाईले भ्रष्टचारको आरोपमा खुबै खेद्नु भयो । अहिले आएर गतल गरे भन्ने लाग्छ ?
गलत भए कसरी १० बर्षको प्रतिबन्ध लाग्छ ? २१ लाख जरिवाना किन तिर्न पर्छ ? नेपालमा आरोप लगाएको भन्दा अदालतले धेरै कम सजाए दिएको छ । लेखा समितिले पटक पटक अख्तियारलाई चिठी लखेको छ । अख्तियारले विदेशी अनुदानको सम्बन्धमा छानविन र कारबाही गर्न मिल्दैन भनेर निर्णय गरेको छ । फुटबल संघमा नेपाल सरकारको अनुदान ५ प्रतिशत समेत छैन । तर बुझ्न पर्ने कुरा कारबाही भयो । विदेशीले कारबाही गर्यो ।
♦ बाहिर हुदाँ आरोप लगाउनेको नेतृत्वमा पुगेपछि प्रमाणित गर्नुपर्ने दायित्व हैन ?
म फुटबल संघमा फुटबल सञ्चालन गर्न आएको हो । कमिकमजोरी भए सुधार गर्न आएको हो । छानविन गर्ने नेपालमा धेरै निकाय छन्, फुटबल संघले गर्ने होईन । छानविन गर्ने निकायले सहयोग मागे हामीले सहयोग गर्ने हो । जुन कुरा उठिरहेको छ, कुरा प्रष्ट पार्ने हाम्रो दायित्व हुन्छ । छानविनको कुरा हामीले गर्न सक्दैनौ ।
♦ नेतृत्वमा आएपछि तपाई पन्छिन खोज्दै हुनुहुन्छ ?
नेपाल हो, छानविन भएन । तर उहाँको सम्पत्तिको कुरा गर्ने हो भने कसैले केही भन्नु पर्दैन भन्ने लाग्छ । होटल बनाउँदै गरेको, के के गरेको सुनिन्छ । सम्पत्तिको कुरा हेर्दा कुनै बिजनेज गर्ने भन्दा अथाह पैसा कमाउनुभएको छ । तर प्रमाणित भएन, त्यो अर्को पाटो हो ।
फुटबल संघ गर्नुपर्ने काम गर्दै जान्छ । बिसंगती र बिकृती नियन्त्रणमा ल्याउन हामी लागिपरेका छौ । जिम्मेवारीमा बसेको हुनाले नियम र कानुन अनुसार काम गर्नपर्छ । उहाँले उठाएका बिषयलाई सार्वजनीक रुपमा बाहिर ल्याउन परे हामी तयार छौ । १० बर्ष कारबाही भईसकेको छ । तर फुटबल संघले जेल हाल्न त सक्दैन, बक्यौता उठाउन त सक्दैन । त्यो काम सरकारी निकायको हो । जब सरकारी निकायले छानविन गर्दैन हामी केही गर्न सक्दैनौ ।
♦त्यसो भए बाहिर बस्दा लगाईएको आरोप अब उठ्ने छैन ?
छानविन गर्ने निकायले आवश्यक ठानेमा हामी सहयोग गर्छौ । तर सार्वजनीक रुपमा पटक पटक उठाउन थाले हामी छानविन गर्छाै । हाम्रो छानविनले कानुनी सजाय पाउने हैन, सार्वजनीक मात्र गर्ने हो । कतिपय कुरा उहाँले पटक पटक सार्वजनीक रुपमा प्रश्न उठाईरहनु भएको छ, एक दिन सार्वजनीक गर्नै पर्छ । फुटबल संघको अहिलेको ध्यान राष्ट्रिय स्तरको खेलाडी जन्माउने, अन्तराष्ट्रिय प्रतियोगितामा सहभागिता जनाएर फिफा वरियता सुधार गर्ने र महिला टिमलाई अन्तराष्ट्रिय प्रतियोतिगा खेलाएर राम्रो नतिजा निकाल्ने हुनेछ ।
प्रतिशोध लिएर छानविन गर्ने कि फुटबलको विकास गर्ने ? प्रतिशोध लिएर छानविन गरे पुरानै परम्परा हुन्छ । एउटा आएपछि अर्कोलाई खुईल्याउने खेल हुन्छ । हामी सकारात्मक रुपमा फुटबलको विकास गर्न चाहन्छौ । विगतको कुरामा निर्णय भईसकेको छ, हामीले मानेर बसेका छौ । अख्तियारले भ्रष्टचारको मुद्धालाई तामेलीमा राखेको छ, त्यसलाई मानेर बसेका छौ । उहाँ फिफाको कारबाहीमा हुनुहुन्छ । फेरी कारबाही गरेर फुटबलको विकास नगरेर उहाँको पछाडी लाग्ने कुरा भएन । हामी फुटबलको विकासमा अघि बढेका छौ । प्रतिशोध लिएर काम गर्दैनौ ।
५८ करोडको पछाडी लागेर फुटबलमा विकास हुन्छ ? ५८ करोडको छानविन प्रमाणित गरेर अन्तराष्ट्रिय क्षेत्रमा नेपाल विश्वकपमा छनोट हुन्छ भने त्यहाँ लागौला । नत्र त्यहाँ लागेर भएको बिग्रन्छ भने किन लाग्नु । उहाँहरुले समस्यै समस्यौ जन्माएर गएको छ । फुटबल संघको तीन तीन बर्षको कर तिरेको छैन । हामीले कर तिर्रौ । जापानीज कोचको समस्या हामीले हल गर्यौ । त्यसले नेपालको अन्तराष्ट्रिय छवि विगारेको छ । केल्मीसंग ५५ लाखको सामान बुझेको छ तर १५ लाखको मात्र स्टोरमा भित्रिएको छ । बाँकी सामान कहाँ गयो ? त्यस्तै कुरा गर्ने हो कहाँ कहाँ पुगिन्छ ।
अहिले अडिट र पेश्की फर्छैयौट समितिले काम सुरु गरिसकेको छ । केही समय लाग्छ । हतार नगरौ । सबै चिज छर्लङ हुन्छ, विगतमा के भएको, अब के हुन्छ सबै स्पष्ट हुन्छ । उहाँहरुले डिस्टर्ब गरेर म त्यसमा लाग्दिन, म आफ्नो काम लाग्छु ।
♦ पछिल्ला ८ महिनामा नेपाली फुटबलमा देखाउन मिल्ने काम के भयो भन्ने लाग्छ ?
घरेलु लिग भयो । यु–१९ मा पहिलो पटक एएफसीमा दोस्रो चरणमा छनोट भयौ । ओलम्पिकमा दोस्रो चरणमा छनोट पुग्यौ । महिला साफ नेपालमा पहिलो पटक काठमाडौं बाहिर गर्दैछौ । ग्रासरुढ सफल भएको छ । विधान संशोधन सहित आर्थिक नियमावली पारित ग¥यौ । कार्यविधि बनाएर एन्फालाई व्यवस्थित बनाउने छौ । समितिलाई क्रियाशिल बनाउँछौ । पद्धती अनुसार फुटबल संघ अघि बढ्छ । कानुनका अभाव छन् । प्रदेश सरकारले जसरी काम गर्न सकेको छैन, त्यही अवस्था फुटबल संघको छ ।
♦ नेपाली फुटबल दक्षिण एसियाबाट कहिले माथी उठ्छ ?
दक्षिण एसियामा हामी तेस्रो अवस्था छौ । फिफा वरियतामा समेत पहिले भन्दा राम्रो छ, अंकमा सुधार छ । पोजिसन सुध्रिएको छैन । हामीले फिफाको अन्तराष्ट्रिय प्रतियोगिता खेल्न पाएका छैनौ ।
फिफाले नेश्नल लिग खेलाउँदै छ । बर्षभरी नेपालले ९ वटा प्रतियोगिता देश बाहिर खेल्नपर्छ । क्लब विश्वकप हुँदैछ । महिलाको प्रतियोगिता बन्दैछ ।
चार बर्षे कार्यकालमा साफ च्याम्पियन कुनै हालतमा हुन्छौ । अहिले रेलिगेशन बिनाको लिग, वाम अर्प लिग भनेर चुट्किला भईरहेको छ, यसको फाईदाको बिषयमा कसैले बिचार गरेका छैनन् ।
हामीसंग राष्ट्रिय टिम बनाउन कति खेलाडी थिए, अब कति हुन्छन् । राष्ट्रिय टिम बलिायो बनाउन धेरै खेलाडी चाहिन्छ । सबै एकै अनुहार आएर प्रतिस्पर्धा भएन । राष्ट्रिय टिमलाई बलियो बनाउन काम गछौ । लिग पछि राष्ट्रिय टिम दुई वटा बनाउछौ । दुई वटा टिमलाई नेपालमा समेत मैत्रिपुर्ण र विदेशमा समेत मैत्रिपुर्ण खेल खेलाउछौ । वि
♦वर्तमान नेतृत्वलाई एन्फाभित्र काम गर्न कत्तिको समस्या छ ?
कानुनको अभावमा निर्णय प्रक्रियामा ढिला सुस्ती छ । सबैसंग सोधेर, सल्लाह गरेर काम गर्नुपर्ने अवस्था छ । आर्थिक खर्च गर्दा कसरी पारदर्शि हुन्छ भनेर लागेका छौ । हामी सिक्दैछौ ।
सिक्दै गर्दा समय लागेको छ । कानुन बनेपछि सबै प्रणालीमा जान्छ । रेफ्री र प्रशिक्षकको क्षमता वृद्धि गर्नपर्नेछ । फुटबलमा हजारौ मानिस प्रशासनमा चाहिएको छ । प्रदेश लिग, जिल्ला लिग, स्कुल लिग, फ्रेन्चाईज लिग गदैछौ । धेरै दक्ष मानिस चाहिएको छ । त्यसमा क्षमता वृद्धि गर्ने काम गछौ ।
♦ तपाईको चार बर्षे कार्यकालमा नेपाली फुटबल कहाँ हुन्छ ?
नेपाली फुटबल व्यवस्थित तरिकाले सञ्चालन हुन्छ । सबै निर्णय प्रणालीमा हुन्छ । धेरै कुरामा परिवर्तन आवश्यक छ । फिफा वरियतामा धेरै माथि जान्छौ । विशेष गरेर महिलामा साफमा च्याम्पियन हुन्छौ । महिलामा एसियामा एक दुई प्रतियोगितामा राम्रो नतिजा निकाल्छौ ।
♦ पुरुष टिमको के हुन्छ ?
ठुलो कुरा गर्दिन, साफ च्याम्पियन हुन्छ ।
♦ के साफको नतिजाले कर्मा छिरिङको चार बर्षको कार्यकालको मुल्याङ्कन हुन्छ ?
हुन्छ । र, अर्को कुरा एन्फासंग जोडिएका सबै जिल्लाको आफ्नै पुवार्धार हुन्छ । क्लबलाई समेत व्यवस्थित रहेर पुर्वाधार बनाउछौ । पुर्वाधारमा धेरै लगानी गछौ । खेलाडी, प्रशिक्षक र अफिसियललाई फुटबलमा लागेर बाँच्ने आधार बनाउने हाम्रो प्रयास रहनेछ ।
