काठमाडौं । एसियन गेम्समा ऐतिहासिक काँस्य पदक सुनिश्चित गरेको कबड्डीको महिला टिमले अभ्यासका लागि हल बनाईदिन सरकारसँग आग्रह गरेको छ । अभ्यास गर्ने कबड्डीको हल नहुँदा खेलाडीलाई धेरै समस्या परेको भन्दै खेलाडीले काठमाडौंमा अभ्यास गर्ने हल बनाईदिन अनुरोध गरेका हुन् ।
नेपालले सोमबार बंगलादेशलाई हराउँदै महिला कबड्डीमा एसियन गेम्समा पदक पक्का गरेको छ । ऐतिहासिक पदकपछि कप्तान मेनुका राजवंशीले बंगलादेशलाई हराएर पदक जित्ने आशा टिमले राखेको बताईन् । ‘बंगलादेशलाई जितेको खण्डमा पदक पक्का भन्ने थियो । धेरै खुसी लागेको छ ।’ खेलपछि राजवंशीले भनिन् ।
उनले भारतमा गरेको तयारीले एसियाडमा सहयोग पुगेको उल्लेख गर्दै कबड्डीलाई समेत क्रिकेट, फुटबल जसरी हेर्दिन सरकारसँग अनुरोध गरिन् । ‘भारतमा राम्रो अभ्यास भयो । ६–७ अभ्यास म्याच खेलन पाएका थियौं । त्यसले हिम्मत दियो । सरकारसँग बिन्ती गर्न चाहन्छौं कि यसलाई समेत क्रिकेट, फुटबल जस्तो गेमलाई हेरे जसरी हेर्दिन पर्यो । काठमाडौंमा अभ्यास गर्ने हल बनाईदिन पर्यो ।’ उनले थपिन् ।
महिला टिमकी प्रशिक्षक पर्वती राईले महिला कबड्डी टिमले इतिहास रचेकोमा खुसी लागेको बताईन् । उनले अवसर र आधारभुत सुविधा पाएको खण्डमा खेलाडीले असम्भव कुरालाई सम्भव बनाउन सक्ने कुरा कबड्डीले प्रमाणित गरिदिएको बताईन् । प्रशिक्षक राईले महिला कबड्डी टिम अझै अघि बढ्न सक्ने समेत बताईन् ।
‘कम्तीमा तेस्रो पदक प्राप्त भएको छ । हामी अझै अघि बढ्छौं । टिम गेममा केही भन्न सकिन्न । खेलाडीको डिफेन्स र अफेन्समा ताल मिल्यो भने टिम अझै अघि बढ्ने सम्भावना छ ।’ उनले थपिन् ।
पहिलो पटक एसियाडमा समावेश महिला कबड्डीले कम्तिमा काँस्य पदक जित्ने पक्का भएको छ । अधिकांश खेलमा नेपाल पदक नजिक पुग्न नसकिरहेको अवस्थामा नेपालको महिला कबड्डी टिमले कम्तिमा काँस्य पदक पक्का गरेको हो ।
