एनबीएलको विजेताले ५ लाख पाउने

काठमाडौं । राष्ट्रिय बास्केटबल लिग (एनबीएल)को विजेताले ५ लाख रुपैयाँ पाउने भएको छ ।

नेपाल बास्केटबल संघले मंगलबार काठमाडौंमा पत्रकार सम्मेलन गर्दै प्रतियोगिताको विजेताले प्राप्त गर्ने पुरस्कारको टुङ्गो घोषणा गरेको हो ।

प्रतियोगिताको उप विजेताले २ लाख ५० हजार र लिगको सर्वोत्कृष्ट खेलाडीले ५० हजार रुपैयाँ प्राप्त गर्ने समेत पत्रकार सम्मेलनमा जानकारी दिईयो । 

पत्रकार सम्मेलनमा संघका अध्यक्ष भिम सिंह गुरुङले प्रतियोगिताको तयारी अन्तिम चरणमा पुगेको जानकारी दिए । राष्ट्रिय बास्केटबल लिग असोज १२ गतेदेखि असोज २७ गतेसम्म काठमाडौंमा सञ्चालन हुदैछ । 

प्रतियोगितामा विशला मिलन केन्द्र, बुढानिलकन्ठ बास्केटबल क्लब, गोल्डेनगेट इन्टरनेश्नल कलेज, हाउन्ड्स एकेडेमी, रोयल स्पोर्टस सेन्ट्रल, टाइम्स इन्टरनेश्नल कलेज, त्रिभुवन आर्मी क्लब र कीर्तिपुर बास्केटबल क्लब गरि ८ टिमले सिंगल राउण्ड रोबिनका आधारमा प्रतिस्पर्धा गर्नेछन् । 

प्रतियोगिताको तयारी स्वरुप सहभागी क्लबलाई तयारी खर्च स्वरुप ५० हजार दिईने र प्लेयर अफ द म्याचलाई ३ हजार रुपैयाँ प्रदान गरिने बताईएको छ । 

राष्ट्रिय खेलकुद परिषद् राखेपले प्रबर्द्धन गरेको बास्केटबल लिगका लागि कभर्डहलको कोर्टको मर्मत भैरहेको बास्केटबल संघले जनाएको छ ।