काठमाडौं । अखिल नेपाल फुटबल संघ एन्फाका केन्द्रिय उपाध्यक्ष दिर्घबहादुर केसी ‘कुमार’ले फुटबल संघ पछिल्लो अवस्थासम्म आईपुग्नुको मुख्य जिम्मेवार एन्फा नेतृत्वनै भएको बताएका छन् ।
उनले नेतृत्वले संयमता र लचकता अपनाउन नसक्दा नेतृत्वविरुद्ध एन्फामा अविश्वासको प्रस्ताव दर्ता हुने अवस्था सिर्जना भएको बताए ।
‘अविश्वासको प्रस्ताव आउँदैछ भन्ने नेतृत्वलाई पूर्व जानकारीनै थियो । सुरुमा उहाँ विशेष साधारण सभा रोक्न सहमतनै हुनुहुन्थ्यो । तर उहाँ आफ्नो निर्णयमा घण्टाबेर पनि टिक्न सक्नुभएन ।’ केसीले भने ।
एन्फामा अध्यक्ष पंकज बिक्रम नेम्वाङ्ग र महासचिव किरण राईविरुद्ध बर्खास्तीको प्रस्ताव (अविश्वास)को प्रस्ताव दर्ता भएको छ । एन्फा नेतृत्वमा आएको एक वर्ष पुरा गरेका नेम्वाङ्गमाथि अविश्वासको प्रस्ताव दर्ता भएको हो ।
एन्फाका ४९ सदस्यहरुले हस्ताक्षर सहित एन्फा नेतृत्व र महासचिवविरुद्ध कार्यसम्पादन गर्न नसकेको १९ वटा आरोप सहित अविश्वासको प्रस्ताव दर्ता गराएका छन् ।
‘निर्वाचित भएर आएका अध्यक्षमाथि अविश्वासको प्रस्ताव आओस् भन्ने कार्यसमितिको चाहना हैन । तर सहमती गरे अघि बढ्ने कुरामा उहाँको कहिल्यै जोड रहेन । निषेधको राजनीति गरेर अघि बढ्न खोज्नु भयो । सोही कारण फुटबल संघमा यो अवस्था आएको हो ।’ उपाध्यक्ष केसीले भने ।
उपाध्यक्ष केसीले क्लबहरुलाई बाहिर राखेर फुटबल चलाउन खोज्दा नेतृत्व संकटमा फसेको उल्लेख गरे ।
‘अधिकांश क्लबले भौतिक रुपमा विशेष साधारण सभा राख्न माग गरेका थिए । नेतृत्वले उनीहरुको कुरा सुन्न पर्दथ्यो । नेपालको फुटबल क्लबहरुकै कारण टिकेको छ । उनीहरुलाई बाहिर राखेर फुटबल चलाउन खोज्नुनै नेतृत्वको मुख्य गल्ती भयो ।’ केसीले थपे, ‘फुटलबको यो संकट आउनुमा म मुख्य जिम्मेवारी नेतृत्वकै देख्छु ।’
