काठमाडौं । गोल्डेनगेट इन्टरनेशनल कलेज र ग्रान्ड स्पोर्टस् सेन्टरले पीसीपीएस कप थ्री बाई थ्री बास्केटबल प्रतियोगिताको उपाधि जितेका छन् । गोल्डेनगेट ब्वाइजतर्फ र ग्रान्ड गर्ल्सतर्फ च्याम्पियन बनेका हुन् ।
ललितपुरको कुपण्डोलस्थित आयोजक पाटन कलेज फर प्रोफेसनल स्टडीजको कोर्टमा भएको ब्वाइज फाइनलमा गोल्डेनगेट कलेजले द इन्साईट भिजन कलेजलाई २१–१३ ले पराजित गर्यो । विजेता गोल्डेनगेटले ३० हजार तथा उपविजेता इन्साईट भिजनले १५ हजार नगद पुरस्कार हात पारे ।
गर्ल्सको उपाधि भिडन्तमा ग्रान्डले बलर्स एकेडेमीलाई १०–६ ले हरायो । उपाधिसंगै ग्रान्डले १५ हजार नगद पुरस्कार पायो भने बलर्र्स एकेडेमीले १० हजारमा चित्त बुझाउनु पर्यो ।
विजेतालाई ललितपुर महानगपालिकाका उप प्रमुख मञ्जली शाक्य बज्राचार्य, लर्ड बुद्ध एजुकेशन फाउण्डेशनका पंकज जलन र पाटन कलेज फर प्रोफेसनल स्टडीजका चीफ अपरेटिङ अफिसर सुनन्द रेग्मी लगायतले एक कार्यक्रमबीच पुरस्कृत गरेका थिए ।
