काठमाडौं । नेपालमा आयोजना हुने १६ औं एसियन क्रस कन्ट्री प्रतियोगिताका लागि सिनियरतर्फ १० खेलाडी छनोट भएका छन् ।
नेपाल एथलेटिक्स संघले आयोजना गरेको खुल्ला छनोटबाट सिनियर पुरुष र महिलामा ५/५ गरि १० खेलाडी छनोट गरेको हो ।
सिनियर १० किमी पुरुषतर्फ छनोट हुने खेलाडीमा मुकेश पाल, दिपक अधिकारी, राजन रोकाया,संजय श्रेष्ठ र दिपक सुहाङ रहेका छन् ।
महिलातर्फ राजपुरा पछाई, पुष्पा भण्डारी, बिन्द्रा धन्के श्रेष्ठ, फुलमती राना र रेखा विष्ट छनोट भएकी छन् ।
जुनियरतर्फ भने खेलाडीको टुंगो लाग्न बाँकी रहेको छ ।
२४ वर्षपछि नेपालमा हुन लागेको प्रतियोगिता फागुन २३ गते काठमाडौंमा आयोजना हुदैछ ।
गोकर्णस्थित गोकर्ण फरेस्ट रिसोर्टमा सञ्चालन हुने प्रतियोगितामा सिनियर पुरुष र महिलातर्फ १० किलोमिटर, २० वर्षमुनिका जुनियर पुरुषतर्फ ८ किलोमिटर र २० वर्षमुनिको जुनियर महिलातर्फ ६ किलोमिटर गरि चार विधामा व्यक्तिगत र टिम इभेन्ट्समा प्रतिस्पर्धा हुनेछ ।
सहभागी देशले एउटा विधामा तीन जना खेलाडीलाई सहभागी गराउन सक्ने व्यवस्था छ । एउटा विधामा पाँचजना सम्म खेलाडी सहभागी देशले उतार्न सक्नेछ ।
प्रतियोगितामा नेपाल सहित एसियाका करिब ३० राष्ट्रले सहभागीता जनाउने अपेक्षा गरिएको छ ।
