काठमाडौं । पल्सर सहिद स्मारक ए डिभिजन लिग अन्तर्गत शनिबार (भोली)बाट सातौ चरणका खेल सुरु हुदैछ । पहिलो दिन एपीएफको हलचोक मैदानमा दुई खेल हुनेछ । नेपाल पुलिस क्लबले हिमालयन शेर्पा तथा एनआरटीले संकटा क्लबलाई चुनौती दिने प्रयास गर्नेछ ।
प्रतियोगितामा औसत नतिजा निकालेका दुवै टोलीलाई अंक तालिकामा एक अर्कालाई उछिन्ने अवसर प्राप्त छ । दुवै टोलीले ६ खेलबाट समान १० अंक जोडेका छन् । गोल अन्तरका आधारमा पुलिस पाँचौ स्थान र हिमालयन छैटौ स्थानमा छ ।
यता, लिगको उपाधि दौडमा देखिएको संकटालाई तालिकामा अझ मजबुद बन्ने अवसर सातौ चरणको खेलमा प्राप्त छ । कारण, उसले तालिकाको पुछारमा रहेको टोली एनआरटीलाई प्रतिद्वन्दीको रुपमा पाएको छ । एनआरटीले प्रतियोगितामा जित दर्ता गर्न सकेको छैन ।
संकटा १५ अंक सहित तालिकाको तेस्रो स्थान र एक अंक जोडेको एनआरटी तालिकाको पुछारमा छ ।
सातौ चरणको दोस्रो दिन आईतबार तीन खेल हुनेछ । एन्फा टेक्निकल सेन्टरमा एपीएफले सरस्वती युथ क्लब तथा थ्री स्टारले जावलाखेल युथ क्लबसंग प्रतिस्पर्धा गर्नेछ । हलचोक मैदानमा च्यासल र फ्रेन्ड्स क्लब आमनेसामने हुनेछन् ।
पहिलो खेलमा भिड्ने एपीएफ र सरस्वतीको लक्ष्य भनेको अंक तालिकामा सुधार गर्नु हुनेछ । क्षमता अनुसारको प्रर्दशन गर्न नसकेको एपीएफको स्कोरिङमा समस्या देखिएको छ । त्यसबाट स्वयम प्रशिक्षक राजेन्द्र तामाङ समेत निराश छन् । सातौ चरणमा गोलको समस्यालाई समाधान गर्नुपर्ने चुनौती एपीएफसंग छ ।
विदेशी खेलाडीको भरमा घरेलु लिगमा औसत प्रर्दशन गर्दै आएको सरस्वती विभागीय टिमको चुनौती पार गर्दै अंक तालिकामा सुधार गर्ने लक्ष्यमा हुनेछ । एपीएफ ७ अंक सहित आठौ स्थानमा रहदाँ सरस्वती ६ अंक सहित नवौ स्थानमा छ ।
सोही दिन हलचोक मैदानमा च्यासल र फ्रेन्ड्सले प्रतिस्पर्धा गर्नेछन् । स्टार खेलाडी अनुबन्धन गरेर नतिजा निकाल्न नसकेको च्यासल टोली दबाबमा छ । प्रशिक्षक राजुकाजी शाक्यले आफ्नो उपाधि होडको सम्भावना सकिएको घोषणा गरिसकेका छन् । चालु लिगमा लयमा देखिन संघर्षरत फ्रेन्ड्सलाई समेत अंक तालिकामा सुधार गर्न च्यासलविरुद्वको खेल महत्वपुर्ण छ ।
च्यासल ७ अंक सहित सातौ र फ्रेन्ड्स ५ अंक सहित दशौ स्थानमा छ ।
सातौ चरणको अन्तिम दिन त्रिभुवन आर्मीले ब्रिगेड ब्वाईज तथा मनाङले मछिन्द्र क्लबसंग खेल्नेछ । दुवै खेल एन्फा टेक्निल सेन्टरमा हुनेछ ।
उपाधि होडमा रहेका मनाङ र आर्मीलाई सातौ चरणको खेल महत्वपुर्ण छ । मुख्य स्ट्राईकर तथा कप्तान भरत खवास निलम्बनमा हुदाँ आर्मीले छैटौ चरणको खेलमा बराबरी खेलेको थियो । प्रतियोगिताका सबै खेल जित्ने एक्लो टोली मनाङलाई समेत कमजोर देखिएको मछिन्द्रलाई हराउँदै उपाधि होडमा अझ बलियो बन्ने अवसर छ । कारण, मछिन्द्रले जारी लिगमा एक जित समेत निकाल्न सकेको छैन ।
मनाङ सत प्रतिशत जित सहति १८ अंक जोडेर शीर्ष स्थानमा र मछिन्द्र ३ बराबरी सहित १३ औ स्थानमा छ । आर्मी १४ अंक सहित चौथो स्थानमा रहदाँ ब्रिगेड ब्वाईज ४ अंक सहित १२ औ स्थानमा छ ।
