हिमालयन शेर्पाविरुद्ध मनाङको इतिहास बलियो
काठमाडौं ।
हिमालयन शेर्पाको स्थापना र उसले माथिल्लो डिभिजनमा खेल्न थालेदेखि मनाङ मस्र्याङदीको बलियो प्रतिद्वन्द्वी भएर अगाडि आएको छ । यी दुई टिम भिड्दा एक फरक खाले विशिष्ट प्रतिस्पर्धा चल्ने गर्छ ।
सहिद स्मारक लिग ए डिभिजन ०७८ को शनिबारको दोस्रो खेलमा यिनै दुई भिड्दै छन् । मनाङको तीन अंक छ भने हिमालयन एक अंकमै सीमित छ ।
हिमालयन शेर्पाले वर्ष ०६८ देखि ए डिभिजनमा खेल्न थालेको हो । अहिलेसम्म यी दुई टिमबीच लिगमा कुल पाँच भेट भएकोमा मनाङको इतिहास बलियो छ ।
यी पाँच खेलमा मनाङ तीन पल्ट विजेता रहेको छ भने एक पल्ट हिमालयन शेर्पा ।
वर्ष ०७६ को खेलमा हिमालयनले मनाङलाई गोलरहित बराबरीमा रोकेको थियो । त्यस अगाडि वर्ष ०७५ मा मनाङ २–१ ले विजयी रह्यो । वर्ष ०७० मा भने हिमालयन २–१ ले विजयी रह्यो ।
लिगमा यो मनाङविरुद्ध हिमालयनको एक मात्र जित हो । मनाङ वर्ष ०६९ मा १–० र वर्ष ०६८ को पहिलो भेटमा २–१ ले विजयी रहेको थियो ।
