राजन र किसनको जोडीलाई मेलम्ची मेयरकप ब्याडमिन्टनको उपाधि 

देवराज सुवेदी । 

सिन्धुपाल्चोक । दोश्रो संस्करणको मेलम्ची मेयर कप ब्याडमिन्टन प्रतियोगिता सम्पन्न भएको छ । 

आईतबार सम्पन्न जिल्ला स्तरीय फाइनलतर्फ मेलम्चीका राजन श्रेष्ठ र किसन दुलालको जोडी पहिलो भएको छ ।

चौताराका रमेश श्रेष्ठ र प्रकाश श्रेष्ठको जोडी दोस्रो र चौताराका सुरेन्द्र श्रेष्ठ र सविन श्रेष्ठको जोडी तथा बलेफिका अजय तामाङ र पूर्णबहादुर थापाको जोडि तेश्रो भएका छन् । 

प्रतियोगितामा ४० बर्षमाथिका खुल्ला पुरुष डबल्समा पहिलो हुनेमा कुमार सापकोटा र राजनमान श्रेष्ठ, दोश्रो हुनेमा नारायणलाल श्रेष्ठ र रविन बोम्जन, तेश्रो हुनेमा चौताराका उपेन्द्र गोले र अमृत श्रेष्ठ चौताराकै अजय पराजुली राकेश थापा रहेका छन् । 

प्रतियोगितामा पहिलो, दोश्रो र तेश्रो हुनेले क्रमश ३३ हजार ३ सय ३३, २२ हजार २ सय २२ र ११ हजार १ सय ११ रुपैँया सहित मेडल र प्रमाणपत्र प्राप्त गरेको मेलम्ची ब्याडमिन्टन एकेडेमीका सचिव ऋषिराम नेपालले जानकारी दिनुभयो । 

कार्यक्रममा पुरस्कार वितरण गर्दै नगर प्रमुख आइतमान तामाङले सबैखाले खेल क्षेत्रलाई नगरपालिकाले उत्तिकै महत्वका साथ हेरेको बताउँदै सहयोग गर्ने कुरामा कुनै कमि नराख्ने बताए । 

उपप्रमुख उमा प्रधानले खेलक्षेत्रमा महिलाहरुलाई पनि सक्रिय सहभागिता जनाउन आग्रह गरिन् । उनले खेलक्षेत्रमा महिलालाई अगाडी बढाउनका लागि नगरपालिकाले सहयोग गर्ने उद्घोष गरिन् ।

प्रतियोगिता अन्र्तगत शुक्रबार सम्पन्न नगरस्तरीय प्रतियोगितामा सिनियरतर्फ राजन श्रेष्ठ र राजु सापकोटाको जोडी पहिलो, कुमार सापकोटा र अनिश दुलाल दोश्रो तथा रुद्र शरण श्रेष्ठ र सुर्दशन दुलाल तथा राजनमान श्रेष्ठ र शैलेश खड्काको जोडीले तेस्रो स्थान प्राप्त गरेका छन् । 

त्यस्तै जुनियरतर्फ रोशन तिवारी र दिपराज तामाङको जोडी पहिलो, सन्तोष कोइराला र दिपक दुलाल दोश्रो, प्रकाश श्रेष्ठ र क्रान्ती तामाङ तथा हरिकृष्ण दुलाल र नारायण सापकोटाको जोडी तेश्रो भएको मेलम्ची ब्याडमिन्टन एकेडेमीका सचिव ऋषिराम नेपालले जानकारी दिए । 

प्रतियोगितामा दुवै तर्फका पहिलो दोश्रो र तेश्रो हुनेले क्रमश १५ हजार ५ सय ५५, १० हजार ५ सय ५५ र ५ हजार ५ सय ५५ रुपैयाँ नगद सहित प्रमाणपत्र प्राप्त गरेको नेपालले जानकारी दिए ।