सरस्वतीसंग ब्रिगेड ब्वाइज पराजित

काठमाडौं । पल्सर सहिद स्मारक 'ए' डिभिजन लिग फुटबलमा सरस्वती युथ क्लबले ब्रिगेड ब्वाइज क्लबलाई पराजित गरेको छ । मंगलबार भएको खेलमा सरस्वतीले ब्रिगेडलाई २ - १ गोल अन्तरले पराजित गरेको हो । 

एन्फा कम्प्लेक्समा सरस्वतीलाई जित दिलाउन बिनोद केसी र फ्रान्सिस ओकेछुुक्वुु ओन्यमले एक एक गोल गरे । ब्रिगेडका अब्दु करिम हामोद न्सीहाले एक गोल फर्काए ।

खेलमा सुरुवाती अग्रता पनि सरस्वतीले नै बनाएको थियो । खेलको तेस्रो मिनेटमा बिनोद केसीले दिपेश श्रेष्ठको पास सदुपयोग गर्दै गोल गरेका थिए ।

तर, खेलको सातौं मिनेटमा ब्रिगेड खेलमा फर्कियो । ब्रिगेडका विदेशी खेलाडी अब्दु करिमले कजिम बुशारीको पासमा गोल गर्दै खेल १ - १ को बराबरीमा ल्याए ।

दोस्रो हाफमा सरस्वतीले थप एक गोल गर्दै महत्वपूर्ण जित निकाल्यो । खेलको ५२ औं मिनेटमा विदेशी खेलाडी फ्रान्सिसले गोल गर्दै सरस्वतीलाई २ - १ को जित दिलाए ।

खेलमा सरस्वतीको सुसन लामा म्यान अफ दि म्याच चुनिए ।

जितसंगै सरस्वतीले ३ खेलबाट ६ अंक जोडेको छ । र, सरस्वती सातौ स्थानमा उक्लिएको छ । ३ अंक जोडेका ब्रिगेड ११ औं स्थानमा छ ।