पोखरा । नवौं राष्ट्रिय खेलकुद प्रतियोगिता अन्तर्गत मंगलबार फेन्सिङमा तीन स्वर्ण पदकको छिनोफानो भएको छ।
पोखराको ब्याडमिन्टन कभर्डहलमा एकल सेवरतर्फ एपीएफका राजेन्द्र गजुरेल, महिलातर्फको फोयलमा आर्मीकी रमा सिंह र पुरुषतर्फको इपिमा बागमती प्रदेशका ओमकार सिंहले स्वर्ण पदक जितेका छन् ।
एपीएफका गजुरेलले एपिएफका लागि पहिलो स्वर्ण जितेका हुन् । यस अगाडी उनले सातौं राष्ट्रिय खेलकुदमा टिम इभेन्टमा रजत, ८ औं राष्ट्रियमा टिम र एकल दुईमा रजत पदक जितेका थिए ।
सेवरमा नेपाल आर्मीका उपेन्द्रबहादुर शाहीले रजत पदक जितेका छन् । त्यसै गरी आर्मी कै रघुविर चन्द्र र एपिएफका खेमराज खत्रीले कास्य पदकमा चित्त बुझाए ।
महिलातर्फको फोयलमा स्वर्ण पदक विजेता सिंहले सातौं राष्ट्रिय खेलकुदमा स्वर्ण र ८ औं राष्ट्रियमा रजत पदक जितेकी थिइन् । एपीएफकी मनिषा राईले रजत पदक र एपिएफकी मनिसा थापा र अनिता अधिकारीले कास्य पदक हात पारे।
पुरुषतर्फ इपिमा स्वर्ण जित्ने सिंहले ८ औं राष्ट्रियमा पनि स्वर्ण पदक जितेका थिए । इपिमा आर्मीका राम थापाले रजत पदक जिते । त्यसै गरी गण्डकी प्रदेशका विजय अधिकारी र एपिएफका मिन कार्कीले कास्य पदक जित्न सफल भए । गण्डकी प्रदेशका अधिकारीले पहिलो पदक जित्न सफल भएका हुन् ।
फेन्सिङको अंक तालिका अनुसार आर्मी शीर्ष स्थानमा छ । आर्मीले दुई स्वर्ण, ३ रजत र ४ कास्य सहित ९ पदक प्राप्त गरेको छ । त्यसै गरी बागमती प्रदेश २ स्वर्ण, १ सय र १ कास्य सहित ४ पदक प्राप्त गरेको छ ।
शसस्त्र प्रहरी १ स्वर्ण, २ रजत र ६ कास्य सहित ९ पदका साथ तेस्रो स्थानमा छ । सुदुरपश्चिम प्रदेश १ स्वर्ण पदक सहित चौथो स्थान छ । त्यसै गरी गण्डकी प्रदेश १ कास्य सहित पाचौं स्थानमा रहेको छ । प्रदेश नम्बर एकले अहिले सम्म पदक जित्न सकेका छैनन् ।
प्रतियोगिताका विजयी खेलाडीलाई राष्ट्रिय खेलकुद परिषदका सदस्य सचिब टंकलाल घिसिङ लगाएतले पदक वितरण गरेका थिए ।
