काठमाडौं । नेपाल बास्केटबल संघलाई लिनिङ नेपालले आधिकारिक किट पार्टनरको रुपमा प्रायोजन गरेको छ ।
काठमाडौंमा मंगलबार पत्रकार सम्मेलनको आयोजना गरेर लिनिङले नेपालको बास्केटबलको आधिकारिक किट पार्टनरको रुपमा प्रायोजन सम्झौता गरेको हो ।
नेपाल बास्केटबल संघका अध्यक्ष भिम गुरुङ र लिनिङ नेपालका प्रमुख राजिन महर्जनले सम्झौता पत्रमा हस्ताक्षर गरेका छन् ।
सम्झौताको अवधि दुई वर्षको रहेको पत्रकार सम्मेलनमा जानकारी दिईएको छ । सम्झौता अनुसार लिनिङले उमेर समुह र राष्ट्रिय टिमका बास्केटबल खेलाडीलाई जर्सी प्रायोजन गर्नेछ । र नेपालको बास्केटबलको आधिकारिक किट अब लिनिङ रहनेछ ।
राष्ट्रिय महिला बास्केटबल टिमकी कप्तान सदिन श्रेष्ठले लिनिङसँगको सम्झौतामा खुसी ब्यक्त गरिन् । उनले पहिलो पटक टिमले प्रायोजन पाएको उल्लेख गर्दै यसले खेलाडीको मनोबललाई उच्च बनाउने धारणा राखिन् ।
.JPG)
बास्केटबल संघका अध्यक्ष गुरुङले सहकार्यका लागि लिनिङ नेपाललाई धन्यबाद ब्यक्त गरे । उनले यस प्रकारको प्रायोजनले खेलाडी र खेलको विकासमा सहयोग पुग्ने धारणा राखे ।
लिनिङ नेपालको मुख्य कम्पनी चाईना ट्रेड लिङ्कका प्रमुख महर्जनले नेपाली बास्केटबललाई सहयोग गर्न पाउँदा खुसी लागेको उल्लेख गर्दै सहयोगलाई निरन्तरता दिने बताए ।
चिनियाँ प्रसिद्ध ब्राण्ड लिनिङले नेपालको फुटबल सहित ब्याडमिन्टनमा सहकार्य र सहयोग गर्दै आएको थियो । लिनिङले नेपाली बास्केटबलको आधिकारिक किट पार्टनरको रुपमा सम्झौता गरेर नयाँ खेलमा आफुलाई बिस्तार गरेको छ ।
