काठमाडौं । पल्सर सहिद स्मारक 'ए' डिभिजन लिग फुटबलमा विभागीय टिम त्रिभुवन आर्मी क्लबले च्यासल युथ क्लबलाई पराजित गरेको छ । शनिबार भएको खेलमा आर्मीले च्यासललाई १–० गोल अन्तरले पराजित गरेको हो ।
हलचोकस्थित एपीएफ क्लबको मैदानमा आर्मीलाई जित दिलाउन विकास खवासले निर्णायक गोल गरे । खेलको २७ औं मिनेटमा खवासले गरेको हेड गोल नै खेलको निर्णायक गोल बनेको थियो ।
निकै प्रतिस्पर्धात्मक खेलको १४ औ मिनेटमा च्यासलका अमिर श्रेष्ठले गरेको कडा प्रहार आर्मीका विकेश कुथुले रोकेका थिए । पहिलो हाफको अन्तिममा आर्मीका भरत खवास गोल गर्न चुके । उनले डि बक्स क्षेत्रबाट हानेको बल पोस्टको केही ईन्च माथिबाट बाहिरिएको थियो ।
४९ औ मिनेटमा सन्तोष साहुखलको फ्रिकिक आर्मीका गोलकिपर विकेश कुथुले मुस्किलले बचाएका थिए । विकेश म्यान अफ दि म्याच चुनिए ।
६३ औ मिनेटमा आर्मीका दिनेश हेम्जनको खाली पोस्टमा गोल गर्न चुके । गोलकपिर बिट भएको अवस्थामा ढिलो गरि उनले प्रहार गरेको बल च्यासलका डिफेन्डर देबेन्द्र तामाङले गोल लाईनबाट रोकेका थिए ।
राष्ट्रिय टिमका युवा स्ट्राईकर विमल घर्तिमगर र घरेलु क्लब फुटबलका सर्वाधिक सफल स्ट्राईकर सन्तोष साहुखलले च्यासलको अग्रपङ्ती सम्हालेपनि गोल गर्न सकेनन् ।
लिगमा आर्मीको यो पहिलो जित हो । पहिलो खेलमा बराबरी खेलेको आर्मीले २ खेलबाट ४ अंक जोडेको छ । १ अंक जोडेको च्यासलको यो पहिलो हार हो ।
