पदक विजेतालाई जैशिदेवलको सम्मान

काठमाडौँ। जैशिदेवल युथ क्लबले पदक विजेता खेलाडी तथा प्रशिक्षकलाई नगद पुरस्कारसहित सम्मान गरेको छ ।

क्लब अन्तर्गतको जैशिदेवल तेक्वान्दो डोजाङले गत हप्ता भारतको आसाममा भएको इन्डिया ओपन कुकिवन डिस्प्याच अन्तर्राष्ट्रिय तेक्वान्दो प्रतियोगिता तथा काठमाडौँमा भएको प्रथम उपत्काव्यापी तेक्वान्दो प्रतियोगितामा पदक विजेता खेलाडीलाई शनिबार सम्मान गरेको हो । 

प्रदेश सांसद विराजभक्त श्रेष्ठ तथा जैशिदेवल युथ क्लबका अध्यक्ष राजेश प्रजापतिले विजेता खेलाडीलाई स्पोर्ट्स सुज र जनही एक हजार रुपैयाँले पुरस्कृत गरे । 

आसाममा भएको अन्तर्राष्ट्रिय प्रतियोगितामा नेपालको प्रतिनिधित्व गरी सहभागी जैशिदेवल तेक्वान्दो डोजाङका ११ जना खेलाडीले पदक जितेका थिए । 

सो प्रतियोगितामा मुविक्क्षा गजुरेलले सब जुनियर क्याटागोरीको ग्योरोगीतर्फ स्वर्ण र पुम्सेतर्फ काँस्य तथा रोजन प्रजापतिले क्याडेट क्याटागोरीको ग्योरोगीतर्फ रजत र पुम्सेतर्फ काँस्यसहित दोहोरो पदक जितेका थिए । आस्ना राना मगर र झरना थापा मगरले पनि स्वर्ण पदक हात पारेका थिए । 

यसैगरी सोनी बानियाँ, राजीव गुरुङ, समर्थध्वज जोशीले रजत पदक तथा सुरेश हाङ लिम्बु, सन्देश राई, राहुल लिम्बु र समर लामाले काँस्य पदक जितेका थिए । यसैगरी उपत्यकाव्यापी तेक्वान्दोमा जैशिदेवल डोजाङले तीन पदक जितेको थियो ।