काठमाडौं । दुई पटक राष्ट्रिय खेलकुद र राखेप च्याम्पियनसिप खेलिन् । तर, उनी गुमनाम रहिन् ।
तीन वर्ष अघि त्रिभुवन आर्मी क्लबमा आबद्द भईन् । अहिले उनलाई कीर्तिमानधारी खेलाडीको रुपमा चिनायो ।
उनी हुन्, एथलेटिक्सकी जयरानी थारु ।
नेपाल एथलेटिक्स संघले आयोजना गरेको ४४ औं राष्ट्रिय एथलेटिक्स प्रतियोगितामा जयरानीले दुई राष्ट्रिय कीर्तिमान आफ्नो नाममा लेखाईन् ।
दुई कीर्तिमानसहित कुल ४ स्वर्ण र एक रजत जितेकी उनी महिलातर्फ सर्वोत्कृष्ट खेलाडी घोषित भईन् ।
२१ वर्षकै उमेरमा ट्रयाक एण्ड फिल्डमा आफुलाई कीर्तिमानी पाउँदा को खुशी हुँदैन होला र ?
'प्रतियोगिता हुँदा र आफ्नो प्रदर्शनबाट धेरै खुशी लागेको छ । धेरै समयबाट ट्रेनिङ मात्र गरेको थिए,' जयरानी पनि खुशी देखिईन् ।
![May be an image of 2 people and people standing](https://scontent.fktm6-1.fna.fbcdn.net/v/t39.30808-6/290537685_1071808730100456_4728235428260802369_n.jpg?_nc_cat=104&ccb=1-7&_nc_sid=0debeb&_nc_ohc=dqB8h1J8xtEAX9w6764&_nc_ht=scontent.fktm6-1.fna&oh=00_AT-5sm4W5R7NDkqCivmaUTVIQ_EZsxKmn_97BbE2RW_uNw&oe=62BD28DE)
बर्दिया घर भएकी जयरानी विद्यालयस्तरीय प्रतियोगिता राष्ट्रपति रनिङ शिल्ड हुँदै ट्रयाक एण्ड फिल्डमा होमिएकी हुन् । तर, जयरानीको प्रदर्शन सहभागिता भन्दा माथि उठ्न सकेन ।
प्रतिभा र क्षमता देखेपछि आर्मी क्लबले २०७५ सालमा जयरानीलाई खेलाडी कोटामा भर्ना गर्यो । बल्ल जयरानीको प्रदर्शनले गति लिन थाल्यो । ४४ औं राष्ट्रिय एथलेटिक्समा जयरानीले आफुलाई प्रमाणित नै गरिन् ।
'स्कुल लेभलबाटै गेमहरु खेल्ने गर्थे । तर, ट्रेनिङ गराउने प्रशिक्षक र उपकरणहरु थिएन । त्यसैले गेम खासै राम्रो थिएन,' सर्वोत्कृष्ट खेलाडी घोषित भएपछि जयरानीले भनिन्, 'आर्मीले मलाई खेलाडी कोटाबाट भर्ति गराएपछि त्यहाँको ट्रेनिङले अहिले रेकर्ड ब्रेक गर्ने मौका पाए ।'
जयरानीले १ सय मिटर र ४ सय मिटर हर्डल्समा राष्ट्रिय कीर्तिमान बनाईन । यस्तै महिला लङजम्प र ४ गुणा १०० मिटर रिलेमा स्वर्ण जित्दा ४ गुणा ४०० मिटर महिला रिलेमा रजत पदक जितिन् ।
जयरानीले १ सय मिटर हर्डल्समा १५.२० सेकेन्डको कीर्तिमान रचेकी हुन् । यसअघि उक्त कीर्तिमान प्रमिला थारुको नाममा थियो । प्रमिलाको टाइमिङ १६.३८ सेकेन्ड थियो ।
४ सय मिटर हर्डल्समा जयरानीले १ मिनेट ०७.२ सेकेन्डको कीर्तिमान बनाईन् ।
जयरानीले छैटौं राष्ट्रिय खेलकुदमा एपीएफकी सविता चौधरीले बनाएको १ मिनेट ०७.७ सेकेन्डको कीर्तिमान भंग गरेकी हुन् ।
![राष्ट्रिय एथलेटिक्स : जयरानीको राष्ट्रिय कीर्तिमान](https://www.khelpati.com/uploads/posts/jayrani%20tharu1656152930.jpg)
प्रतियोगिताको लागि राम्रो तयारी नगरेपनि स्वर्णको आशा जयरानीले गरेकी थिइन् । उनलाई कीर्तिमान बनाउछु भन्ने लागेको थिएन ।
'ट्रेनिङ खासै राम्रो थिएन अहिले हाम्रो । रेकर्ड बनाउछु भन्ने आश थिएन । स्वर्ण जित्छु भने आश थियो,' जयरानीले भनिन् ।
जयरानीले राष्ट्रिय स्तरको प्रतियोगितामा पहिलो पटक स्वर्ण पदक जितेकी हुन् ।
जयरानीले पूर्वान्चलमा (प्रदेश-१) भएको सातौं राष्ट्रिय खेलकुद र प्रदेश ५ (लुम्बिनी प्रदेश) मा भएको आठौं राष्ट्रिय खेलकुदमा आफ्नो क्षेत्रको प्रतिनिधित्व गर्दै प्रतिस्पर्धा गरेकी थिइन् । यस्तै २०७४ को राखेप च्याम्पियनसिप खेलेकी थिइन् ।
![May be an image of 6 people and people standing](https://scontent.fktm6-1.fna.fbcdn.net/v/t39.30808-6/290644202_1071789943435668_4490008196599817254_n.jpg?_nc_cat=107&ccb=1-7&_nc_sid=0debeb&_nc_ohc=RZqKWBaAD2oAX-H3W4E&_nc_ht=scontent.fktm6-1.fna&oh=00_AT-xrCYEbB48kLcL1nZDyBNSAR8IasigRnihDsS8cga_AQ&oe=62BE5F13)
२०७२ सालबाट एथलेटिक्स खेल्न थालेकी जयरानीलाई पछिल्लो समय केशरी चौधरीसँग तुलना गर्न थालिएको छ । तत्कालिन समय नेपाल पुलिसबाट खेल्ने केशरी दुबई पलायन भईसकेकी छिन् ।
तर, सातौं राष्ट्रिय खेलकुदमा केशरीसँग प्रतिस्पर्धा गरेकी जयरानी ट्रयाक एण्ड फिल्डमा केशरीको विरासतलाई तोड्ने योजनामा छिन् ।
'अहिलेको भन्दा राम्रो गर्ने लक्ष्य रहेको छ । तर, खेल नभएपछि ट्रेनिङ गरेको महत्व हुँदैन । यो इभेन्ट्समा प्राय गेम नै हुदैन । वर्ष वर्षमा भए खेलाडीको स्तर कस्तो छ भने थाहा हुन्छ,' जयरानी भन्छिन् ।