काठमाडौं । अखिल नेपाल फुटबल संघ (एन्फा)को नेतृत्व चयनमा कर्माछिरिङ शेर्पा पराजित भएपछि सो समुहको नेतृत्व दिर्घबहादुर केसी (कुमार)ले गर्ने भएका छन् ।
आफ्नो समुहबाट निर्वाचित कार्यसमिति सदस्यलाई मंगलबार बिहान भेट गर्दै निवर्तमान अध्यक्ष शेर्पाले स्वागत तथा शुभकामना दिएका थिए । उनले नेतृत्वमा आफु पराजित भएपछि समुहको नेतृत्व कुमारले गर्ने बताए ।
निर्वाचितमा पराजित भएपछि शेर्पाले आफु फुटबलबाट टाढा नरहने तथा खराब राजनीतिमा आफु संलग्न नहुने धारणा राखेका थिए ।
सोमबार सम्पन्न एन्फा निर्वाचनमा पदाधिकारीमा शेर्पा समुहबाट कुमारमात्र उपाध्यक्षमा निर्वाचित भएका थिए । चार उपाध्यक्षका लागि भएको निर्वाचनमा शेर्पा समुहबाट कुमारमात्र निर्वाचित भए । अध्यक्षमा शेर्पा पंकजबिक्रम नेम्वाङसँग पराजित हुँदा वरिष्ठ उपाध्यक्षमा शेर्पा समुहका शिक्षित पराजुलीलाई वीरबहादुर खड्काले हराए ।
चार उपाध्यक्षमध्य नेम्वाङ समुहबाट दावा लामा, दिपक खतिवडा र विराजजंग शाही निर्वाचित भएका थिए । शेर्पा समुहका कुमार चौथो स्थानमा रहँदै उपाध्यक्षमा निर्वाचित भए । उपाध्यक्षमा नेम्वाङ समुहका सुन्दर नरसिंह जोशी र शेर्पा समुहबाट उपेन्द्रमान सिंह, बिज्ञानराज शर्मा र रत्नकुमार श्रेष्ठ पराजित भएका थिए ।
‘चुनावमा पराजित भएपनि फुटबलको एजेण्डामा निरन्तर लाग्नेछौं । उपाध्यक्षको हैसियतले कुमारले हाम्रो समुहको नेतृत्व गर्नुहुनेछ ।’ शेर्पाको भनाई उद्धित गर्दै नवनिर्वाचित केन्द्रिय सदस्य टिका लामाले भने ।
शेर्पा प्यानलबाट केन्द्रिय सदस्यमा मनिष जोशी, रमेश ब्यन्जनकार, मनिराज विष्ट, टिकाराम लामा, भरतबुढ क्षेत्री र पेमा डोल्पा शेर्पा निर्वाचित भएका छन् । २१ सदस्यीय कार्यसमितिमा शेर्पा प्यानलबाट उपाध्यक्ष सहित ७ जना निर्वाचित भएका छन् । दुई केन्द्रिय सदस्यमा चार जनाको मत बराबर आएको छ । जसमा तीन जना शेर्पा पक्षका छन् । एन्फाको अर्को साधारण सभाले ती दुई केन्द्रिय सदस्यको टुङ्गो लगाउनेछ ।
‘पूर्व अध्यक्ष शेर्पाले राम्रो काममा नेतृत्वलाई सहयोग गरेर अघि बढ्न निर्देशन दिनुभएको छ । नराम्रो कामलाई खबरदारी गर्नुपर्ने बताउनुभएको छ ।’ लामाले भने ।
नेतृत्व गुमाएसंगै संस्थापन पक्षले जिल्लामा आफुहरुलाई पेल्न सक्ने भन्दै सदस्य जिल्लाले शेर्पासँग चासो राखेका थिए । जवाफमा शेर्पाले नेतृत्वको कार्यशैली हेरेर रणनीति बनाउनुपर्ने धारणा राखेका थिए ।
एन्फाको पछिल्लो निर्वाचनमा तीन समूह प्रस्ट रुपमा देखिएका छन् । पछिल्लो चुनावले शेर्पा र नेम्वाङ समुहसँगै पूर्व अध्यक्ष गणेश थापाको समूह फुटबल राजनीतिमा शक्तिशाली बनेर फर्किएको छ ।
-1732671005.webp)
