काठमाडौं । अखिल नेपाल फुटबल संघ (एन्फा)को कार्यसमिति बैठक आज (आईतबार) बस्दैछ । ललितपुरको सातदोबाटोस्थित एन्फा कम्प्लेक्समा बस्ने बैठक दिउँसो २ बजेका लागि बोलाईएको छ । बैठकको एक मात्र एजेण्डाको रुपमा राष्ट्रिय फुटबल टिममा देखिएको विवादलाई राखिएको छ ।
मुख्य प्रशिक्षक अब्दुल्लाह अलमुताईरीले राष्ट्रिय टिमका सिनियर १० खेलाडीलाई टिमबाट निकालेपछि प्रशिक्षक–खेलाडी विवाद उत्कर्षमा छ । प्रशिक्षक अलमुताईरीले पटक पटक राष्ट्रिय टिमबाट निस्किएर जान चेतावनी दिएपछि सिनियर १० खेलाडीले राष्ट्रिय टिमको बन्द प्रशिक्षण छाडेका थिए । सिनियर टिमका १० खेलाडीले क्याम्प छाडेपछि एसिया कप छनोटको तयारी प्रभावित बनेको छ ।
प्रशिक्षक अलमुताईरीले सिनियर खेलाडीलाई देखाउन भन्दै विदेशमा फुटबल खेलिरहेका केही खेलाडीलाई राष्ट्रिय टिमको बन्द प्रशिक्षणमा मौका दिएका छन् । तर विवादका कारण केही खेलाडीले क्याम्प छाडेका छन् भने अधिकांश सिनियर खेलाडीले अलमुताईरीसँग प्रशिक्षणमा सहभागी हुन मानेका छैनन् ।
एन्फाभित्र पटक पटक विवादमा आउने गरेका प्रशिक्षक अलमुताईरीले यसअघि वरिष्ठ उपाध्यक्ष पंकजबिक्रम नेम्वाङ्गलाई सामाजिक सञ्जालमार्फत आरोप लगाएर विवादमा तानिएका थिए । फुटबलको अनावश्यक विवादमा तानिने गरेका अलमुताईरी यसपटक आफ्नै खेलाडीसँग टसलमा परेका छन् ।
प्रशिक्षक–खेलाडी विवाद लम्बिदै जादा एन्फाका उपाध्यक्षत्रयले निवेदन दिदै एन्फा बैठकको माग गरेका थिए । एन्फाले खेलाडीको माग अनुसार विवादको छानविन गर्न एक सदस्यीय समिति समेत गठन गरको थियो । तर सो समितिबाट काम नहुने भन्दै फुटबल खेलाडी संघ र राष्ट्रिय तथा अन्तराष्ट्रिय खेलाडी संघले नयाँ छानविन समितिको माग गरेका छन् ।
खेलाडी र प्रशिक्षक बीच देखिएको विवादमाथि छलफल र निर्णय गर्न एन्फाले आईतबार कार्यसमिति बैठकको आह्वान गरेको हो । घटनाको सत्य तथ्य छानविन हुनुपर्ने खेलाडीको माग छ । अलमुताईरीको प्रशिक्षकत्वमा आफुहरु राष्ट्रिय टिममा सहभागी हुन गाह्रो हुने खेलाडीले बताईसकेका छन् ।
-1732631466.jpeg)
