काठमाडौं । नेपालले आसन्न एसियन गेम्समा २३ खेलमा प्रतिस्पर्धा गर्ने भएको छ ।
राष्ट्रिय खेलकुद परिषद् (राखेप)को बोर्ड बैठकले एसियन गेम्समा सहभागी हुने खेलको टुङ्गो लगाएको हो ।
बैठक स्रोतका अनुसार तेक्वान्दो, कराते, बक्सिङ, एथलेटिक्स, साइक्लिङ, फुटबल महिला, गल्फ, कुस्ती, भारत्तोलन, जुडो, पौडी, ट्रायथेलन, उसु, आर्चरी, बास्केटबल, कबड्डी महिला, फेन्सिङ, ह्याण्डबल महिला, महिला भलिबल, पुरुष क्रिकेट, सुटिङ, ब्याडमिन्टन र टेबल टेनिसले आसन्न एसियन गेम्समा सहभागी हुने भएका छन् ।
राखेपले एसियन गेम्समा सहभागी गराउने खेलको सन्दर्भमा प्रतिवेदन दिन समिति गठन गरेको थियो । समितिको सुझावका आधारमा बोर्ड बैठकले चीनमा यसै वर्ष हुने एसियन गेम्समा २३ खेलमा प्रतिस्पर्धा गर्ने निर्णय गरेको हो ।
बोर्ड बैठकले एसियन गेम्सको तयारी, खेलाडी छनोट, बन्द प्रशिक्षण र आवश्यक बजेटको प्रक्रिया तत्काल अघि बढाउने निर्णय समेत गरेको छ ।
-1732631466.jpeg)
