सीताले टेलरको कप्तानीमा फेयर ब्रेक खेल्ने 

काठमाडौं । फेयर ब्रेक इन्भिटेसनल-२०२२ मा नेपाली महिला क्रिकेट अलराउन्डर सीता राना मगरले वेष्ट इन्डिजकी कप्तान स्टेफनी टेलरको कप्तानीमा खेल्ने भएकी छिन् ।

क्रिकेट हङकङको आयोजनामा दुबईमा हुने प्रतियोगितामा सीताले महिला क्रिकेटकी निकै अनुभवी तथा विश्व विजेता कप्तानको कप्तानीमा खेल्ने भएकी हुन् ।

नेपाली राष्ट्रिय महिला क्रिकेट टोलीकी उप-कप्तान सीता अन्तर्राष्ट्रिय फ्रेन्चाइज क्रिकेटमा अनुबन्धन हुने पहिलो नेपाली खेलाडी हुन् । उनीले टिम टोर्नाडोजबाट प्रतियोगिता टेलरको कप्तानीमा खेल्ने पक्का भएको छ ।

टिम टोर्नाडोजमा टेलरसँगै सोफी डिभाइन (न्युजिल्यान्ड), स्टेर्रा कालिस (नेदरल्याण्ड), अन्द्रेअ मे जेपेडा (अस्ट्रिया), चानिदा सुथिरिंगा (थाइल्याण्ड), मेरी-अन्ने मुसोन्डा (जिम्बाबे), सुने लुस् (दक्षिण अफ्रिका), सीता राना मगर (नेपाल), अलिया राएज (पाकिस्तान), दिभ्य सक्सेना (क्यानाडा), विनिफ्रेड दुराइसिंगम (मलेसिया), नतासा मिल्स (हङकङ), मार्यम बीबी (हङकङ), डियना बैग (पाकिस्तान) रहेका छन् ।

यस्तै टिमको प्रशिक्षकमा पूर्व भारतीय महिला क्रिकेट टिमकी कप्तान अन्जु जैन रहेकी छिन् । जैन सन् १९९३ देखि २००५ सम्म ८ टेष्ट र ६५ एकदिवसीय अन्तर्राष्ट्रिय क्रिकेट खेलेकी छिन् । उनले सन् २०११ देखि सन् २०१३ सम्म भारतको राष्ट्रिय टिमको समेत प्रशिक्षकको रुपमा काम गरेकी थिएन् ।

फेयर ब्रेक इन्भीटेसनल २०२२ अन्तर्राष्ट्रिय क्रिकेट परिषद् (आईसीसी) बाट मान्यता प्राप्त महिला टि-२० क्रिकेट प्रतियोगिता हो । यो प्रतियोगिता आगामी सन २०२२ मे १ देखि मे १५ सम्म हंगकंगमा खेलिनेछ।

६ टोली सम्मिलित प्रतियोगितामा भारतकी हर्मप्रित कौर, पाकिस्तानकि सना मिर जस्ता विश्वका चर्चित खेलाडीहरुको सहभागिता रहने छ । क्रिकेटको माध्यमबाट लैंगिक समानता र महिलालाई समाजको मुलधारमा ल्याउने उदेश्यका साथ यस प्रतियोगिताको आयोजना हुँदैछ ।