नेपाल विश्वकप नजिक तर धेरै टाढा 

काठमाडौं । अक्टुबर १६ बाट अष्ट्रेलियामा हुने आईसीसी पुरुष टी–ट्वान्टी विश्वकपका लागि नेपाल अन्तिम एक पाइला मात्र पर छ । 

अन्तिम एक खुडकिलोको यात्रा तय गर्न सके आठ वर्षपछि नेपालले पुनः विश्वकपमा आफ्नो झण्डा फहराउने अवसर प्राप्त गर्नेछ । 

तर सोही एक खुडकिलो भने फलामको चिउरा चपाउनु सरह हुनेछ नेपाललाई ।

किनभने शुक्रबारबाट ओमानमा सुरु हुन लागेको आईसीसी पुरुष टी–ट्वान्टी विश्वकप ग्लोबल छनोटमा नेपालको विश्वकपको भविष्य केवल चार खेलले टुंगो लगाउने छ ।

अर्थात समूह चरणमा आयोजक ओमान, फिलिपिन्स र क्यानाडाबीच आफूलाई शीर्ष दुई स्थानमा उभ्याउदै सेमिफाइनलको यात्रा सुनिश्चित गरेर सेमिफाइनलमा विजयी भएमात्र नेपालले अष्ट्रेलियामा आफ्नो झण्डा फहराउने सुनिश्चित गर्नेछ । 

यसो हेर्दा केवल चार खेल त हो, राम्रो खेले सहजै विश्वकप पुगिन्छ भन्ने पनि लाग्न सक्ला ।

तर समूह चरणका तीन र सेमिफाइनलको एक खेलमा नेपाललाई कुनै पनि गल्ती वा बहाना बनाउन पाउने स्थान हुनेछैन । अन्यथा धेरै नजिक पुगेर पनि धेरै टाढा हुने सम्भावना उत्तिकै छ ।

ओमान जानु अघि नेपाल क्रिकेट टिमका मुख्य प्रशिक्षक पुबुदु दासानायकेले पनि स्पष्ट भनेका थिए कि चार टोलीमात्र रहेको समूहमा कुनै पनि खेलमा नेपाललाई गल्ति गर्ने छुट हुनेछैन ।

‘छनोटमा १४ देखि १६ टिम भयो भने छनोट हुने मौका धेरै हुन्छ । किनभने कुनै एउटा खराब दिनबाट पछि माथि उठ्न सक्छौ । तर चार टिम भएको समूहमा हामीले खराब दिनको बारेमा सोच्न सक्दैनौ, सबै खेलमा राम्रो खेल्नै पर्छ,’ दासानायकेले भनेका थिए । 

त्यसको उदारण भर्खरैमात्र ओमानमा सम्पन्न चारदेशीय टी–ट्वान्टी सिरिजमा नेपालले देखाइसकेको छ । 

चारदेशीय सिरिज नेपालका लागि ग्लोबल छनोटको तयारी, ओमानको मैदानको अवस्था, खेलाडीहरुको प्रदर्शन आंकलन गर्ने तथा सहभागी टिमहरुको बारेमा अध्ययन गर्ने अवसरको रुपमा रहेको थियो । 

सिरिजमा नेपालले युवा क्रिकेटरहरु लोकेश बम, सागर ढकाल र विवेक यादवलाई डेब्यू समेत गरायो तर केवल लोकेशको युएईविरुद्ध गरेको ब्याटिङले केही आशा भने जगाएको थियो । 

समग्र रुपमा आयोजक टोली ओमान, युएई र आयरल्यान्डविरुद्ध खेल्दा नेपालले केवल ओमानविरुद्ध मात्र जित निकाल्न सक्यो, बाँकी दुई खेलमा पराजय भोग्यो । 

दिपेन्द्र सिंह ऐरीको अलराउन्डर प्रदर्शनमात्र सम्झन लायक रह्यो । 

युएईविरुद्ध बलिङमा चुकेको नेपाल भने आयरल्यान्डविरुद्ध ब्याटिङमा चुक्न पुग्यो । 

तर यस्ता गल्ती भने छनोटका खेलहरुमा स्वीकार्य हुनेछैन, किनभने एउटा गल्तीले मात्र पनि नेपालको विश्वकप खेल्ने सपनालाई चकनाचुर पारिदिनेछ । 

छनोटको चारवटै खेलमा नेपालले केवल राम्रो खेल्दै मन जितेर मात्र पुग्ने छैन, जित अवश्य नै निकाल्नु पर्नेछ । 

सिरिजका क्रममा ओमानलाई पराजित गरेको हिसाबले नेपालले विश्वकप छनोटको आफ्ना पहिलो खेलमा ओमानविरुद्ध उच्च मनोबलका साथ मैदानमा उत्रिएपनि युएई र आयरल्यान्डविरुद्ध भोगेको पराजयले भने सचेत भने पक्कै बनाउनेछ । 

अझ अर्को महत्वपूर्ण कुरा के छ भने नेपालले ओमान, फिलिपिन्स र क्यानाडालाई समूह चरणमा पछि पारेर सेमिफाइनलमा प्रवेश गरेपनि आयरल्यान्ड अथवा युएई विरुद्ध जित निकाल्नै पर्ने हुन्छ । 

तर ती दुई टोलीबीच चारदेशीय सिरिजमा भोगेको पराजयले भने नेपाललाई तर्साउन सक्छ र नेपाल विश्वकपको नजित भएर पनि धेरै टाढा हुन सक्नेछ ।