युएईमाथि ओमानको शानदार जित

काठमाडौं । ओमानमा जारी चारदेशीय टी–ट्वान्टी क्रिकेट सिरिज अन्तर्गत आयोजक ओमानले अन्तिम खेलमा युएईलाई पराजित गरेको छ । 

अल अमेरात क्रिकेट मैदानमा ओमानले युएईलाई ७ विकेटले पराजित गरेको हो । 

१ सय ६५ रनको लक्ष्य ओमानले ३ विकेट गुमाएर १९ दशमलब ३ ओभरमा पुरा गर्यो । 

ओमानलाई जित दिलाउन कश्यप प्रजापतिले अविजित ६९ रनको योगदान गरे । कश्यपले ५३ बल खेल्दा ८ चौका हिर्काए ।  

शोएव खानले ३४ रनको योगदान गरे ।

युएईका कासिफ दाउद र बसिल हमिदले एक–एक विकेट लिए ।

यस अघि टस हारेर पहिले ब्याटिङ गरेको युएईले निर्धारित २० ओभरमा ८ विकेट गुमाएर १ सय ६४ रन जोडेको थियो । 

युएईका लागि मोहम्मद वासिमले ४४ बलमा सर्वाधिक ८४ रनको योगदान गरे । वासिमले ३ चौका र ८ छक्का हिर्काएका थिए । 

ओमानका आमिर कलिमले सर्वाधिक ५ विकेट हात पारे । 

विलाल खान, कलिमुल्लाह र अयान खानले एक–एक विकेट लिए ।