पोखरा । कास्की जिल्ला क्रिकेट संघको आयोजनामा शनिबारीय क्लब स्तरीय टी–२० लिग च्याम्पियनसिपमा पोखरा क्रिकेट क्लबले विजयी सुरुआत गरेको छ।
पोखरा रंगशाला क्रिकेट मैदानमा शनिबार भएको उद्घाटन खेल पोखरा क्रिकेट क्लबले सांग्रिला क्रिकेट क्लबलाई १५ रनले पराजित गर्यो ।
टस जितेर व्याटिङ रोजेको पोखरा क्रिकेट क्लबले २० ओभरमा १ सय २८ रन बनायो । अनिल गुरुङले ५८ रन बनाए । उनी अन्तिम ओभरमा क्याच भए ।
पोखरा क्रिकेट क्लबले ९ विकेटको क्षतिमा १ सय २८ रन बनाउने क्रममा अनिल बाहेक अन्य व्याटरको योगदान उल्लेख्य देखिएन् ।
सांग्रिलाका बलरतर्फ सुदिप पौडेल र राजु तामाङले ३/३ तथा विपिन खत्रीले २ विकेट लिए ।
पोखराले दिएको १ सय २९ रनको लक्ष्य पछ्याएको सांग्रिला क्रिकेट क्लब १९.१ ओभरमा १ सय १३ रनमा समेटियो । सांग्रिलाका लागि विराट दवाडीले १६, विपिन खत्रीले १५ र अरुण अधिकारीले १३ रनको योगदान दिए ।
पोखरा क्रिकेट क्लबका बलर अनिष खड्काले ३ सुवास भण्डारीले २, अनिल गुरुङले २ विकेट लिए ।
प्रतियोगितामा पोखरा क्रिकेट क्लबका अनिल गुरुङ म्यान अफ दि म्याच घोषित भए ।
संघको नयाँ नेतृत्वपछिको पहिलो कार्यक्रम अन्तर्गत क्लबस्तरीय टी–२० शनिबारीय लिग आयोजना गरेको हो ।
प्रतियोगिताको उदघाटन राष्ट्रिय खेलकुद परिषदका सदस्य राजेश गुरुङले गरेका थिए । आगामी फागुन १४ गते शनिबार दुई खेल खेलाईने छ ।
प्रतियोगिता ९ हप्ता चल्ने छ । प्रतियोगितालाई व्यवसायिक संस्था वाईन किङले मुख्य प्रायोजन गरेको छ ।
१४ गते अरण्यज्योतिले कास्की क्रिकेट क्लबसँग र राईजिङ क्रिकेट क्लबले माछापुच्छ्रे क्रिकेट क्लबसँग प्रतिस्पर्धा गर्ने छ ।
कास्की जिल्ला क्रिकेट संघको अध्यक्ष सन्जयकान्त सिग्देलको अध्यक्षतामा भएको उदघाटन समारोहमा पश्चिमाञ्चल क्षेत्रीय खेलकुद विकास समिति पोखराका कार्यालय प्रमुख लक्ष्मण योगी, प्रशिक्षण विभाग प्रमुख कृष्ण तिमिल्सिना, जिल्ला खेलकुद विकास समितिका अध्यक्ष तोरण बानियाँ, संघका उपाध्यक्ष दिपेन्द्रप्रताप चन्द लगायतले सम्बोधन गरेका थिए ।
-1737994469.jpg)
