काठमाडौं । नेपाली क्रिकेट टिमका कप्तान सन्दीप लामिछानेले आईसीसी पुरुष टी–ट्वान्टी विश्वकपको ग्लोबल छनोटका लागि नेपाली टिमको तयारी ६० देखि ७० प्रतिशत पुगेको बताएका छन् ।
लामिछानेले ओमानमा हुने छनोट अघि टिमको तयारी पुरा हुने बताए ।
कोरोनाका कारण चार दिनदेखि आईसोलेसनमा रहेका लामिछानेले नेपाली टोलीले आफ्नो क्षमता अनुसार खेले यसै वर्ष अष्ट्रेलियामा हुने विश्वकपका लागि छनोट हुने विश्वास व्यक्त गरे ।
‘प्रतियोगिताका लागि समय रहेका कारण कोभिड लागेका खेलाडीहरु पनि ठिक भएर टिममा फर्किने तथा छनोट अघि ओमानमा हुने आयरल्यान्ड, ओमान र युएईसँगको सिरिजले टिमलाई सहयोग गर्नेछ,’ लामिछानेले थपे ।
तर अवस्था आए खेलाडीहरु परिवर्तन पनि हुन सक्ने संकेत लामिछानेले गरे ।
लामिछानेले टिमका सदस्यहरुसँग टिमको योजनाबारे निरन्तर छलफल भइरहेको समेत बताए ।
उनले विश्वकप छनोट आफ्नो लागि मात्र नभएर सबैका लागि उत्तिकै महत्वपूर्ण रहेको जनाए ।
लामिछानेले विदेशमा खेलेको तथा फ्रेन्चाईज क्रिकेटको अनुभवले नेपाली टिमलाई नेतृत्व गर्ने राम्रो अवसर प्राप्त भएको बताए ।
कप्तानीको भूमिका निर्वाह गर्न गाह्रो नभएको तथा टिमका सबैलाई चिनेको हुनाले फरक नपर्ने बताए ।
कप्तान लामिछानेले नेपाली टिमसँग दवाव झेल्न सक्ने क्षमता रहेको बताए ।
