दक्षिण एसियाली खेलाडीको भरमा विश्वकपको सपना देख्दै जर्मनी
काठमाडौं । आईसीसी पुरुष टी–ट्वान्टी विश्वकप ग्लोबल छनोटमा प्रतिस्पर्धा जर्मनी एक ‘अन्डरडग’ टोलीको रुपमा रहने निश्चित छ ।
जर्मनी ग्लोबल छनोट अन्तर्गत समूह ‘ए’ मा रहेको छ । यसै समूहमा जर्मनीसँगै आयोजक ओमान, नेपाल, बहराईन, क्यानाडा, आयरल्यान्ड, फिलिपिन्स र युएई रहेका छन् ।
यो समूहभित्र पनि दुई समूह बनेका कारण जर्मनीले भने आयरल्यान्ड, युएई र बहराई जस्ता बलिया टोलीविरुद्ध भिड्नु पर्नेछ ।
यदि यसै वर्ष अष्ट्रेलियामा हुने विश्वकपमा स्थान सुरक्षित गर्नुछ भने जर्मनीले समूह चरणमा कम्तिमा दोस्रो हँुदै सेमिफाइनल खेल जित्नुपर्नेछ ।
खासमा जर्मनी पहिलो पटक ग्लोबल छनोटमा स्थान बनाउन सफल भएको हो र जर्मनी क्रिकेट टिमका लागि यो नै ठूलो सफलता हो ।
टिमका कप्तान भेनकट गणेसनका लागि यो ऐतिहासिक उपलब्धी हो ।
जर्मन क्रिकेट फेडेरेसनका सिइओ ब्रायन मान्टलेको भनाई अनुसार जर्मनीले आफू भन्दा ५० गुणा बढी क्रिकेट बजेट भएका टोलीविरुद्ध विश्वकप छनोटमा प्रतिस्पर्धा गर्नेछ ।
‘त्यसैले हामी छनोट प्रतियोगिताको एक ठूलो अन्डरडग टिमका रुपमा रहनेछौ,’ मान्टलेले भने ।
मान्टलेका अनुसार जर्मनीलाई विश्वकपमा स्थान भन्दा पनि जित्ने अवसर प्रदान गर्नेछ ।
‘यसको अर्थ यो होइन कि विश्वकपका लागि छनोट नै हुनुपर्छ, हामी एक वा दुई वटा आश्चर्यचकित नतिजा निकाल्ने प्रयासमा हुनेछौ ।’
जर्मनी टिममा खासगरी विदेशी आप्रवासीहरुको बाहुल्यता रहेको छ । र उनीहरुका लागि जर्मनी नै आफनो घर हो ।
अफगानिस्तान, बंगलादेश, भारत, पाकिस्तान र श्रीलंका जस्ता क्रिकेट खेल्ने देशका आप्रवासीका कारण जर्मनीमा क्रिकेटको उदय भएको हो ।
टिमका कप्तान भेनकट गणेसन नै भारतीय मुलका हुन् र उनले तमिल नाडुमा हुँदा भारतीय क्रिकेट टिमका रविचन्द्रन आश्विन र दिनेश कार्तिक जस्ता खेलाडी उनका साथी थिए ।
यता तल्हा खानले पाकिस्तानका लागि उमेर समूहमा खेलिसकेका छन् ।
सन् २०१५ मा करिब १ लाख ८० हजार अफगान नागरिकले जर्मनीमा शरण खोजे । त्यसमध्ये अधिकांश ३० वर्षमुनीका थिए र क्रिकेटको माध्यमबाट आफ्नो उपस्थिति महसुस गराए ।
तल्हा खानका अनुसार अफगानी क्रिकेटरले जमर्नीको क्रिकेटमा परिवर्तन ल्यायो ।
जसको नतिजा अहिले जर्मनी विश्वकप छनोटको संघारमा छ ।
युरोन्यूजको सहयोगमा ।
