एएफसी कपमा बलियो भएर जाने छौँ : प्रशिक्षक कटवाल

काठमाडौं । मछिन्द्र फुटबल क्लबका मुख्य प्रशिक्षक प्रवेश कटवालले एएफसी कप छनोटमा बलियो टोलीको रुपमा सहभागिता जनाउने बताएका छन् ।

सहिद स्मारक 'ए' डिभिजन लिग अन्तर्गत आइतबार नेपाल पुलिस क्लबलाई १-० गोल अन्तरले हराएसँगै मछिन्द्रले एएफसी कप छनोटमा स्थान पक्का गरेको थियो ।

खेलपछि पोस्ट म्याचमा प्रशिक्षक कटवालले केहि विदेशी खेलाडी अनुबन्ध गर्दै बलियो टिमको रुपमा छनोट खेल्ने बताए ।

'अब एएफसी कपका लागि हामी बलियो टोली बनेर जाने छौँ  । केही नयाँ विदेशी खेलाडी थप्ने छौ र यिनै नेपाली खेलाडीलाई तयार पार्ने छौँ,' उनले भने, 'तर हामी अन्य क्लबका खेलाडी अनुबन्ध गर्दैनौं ।'

मछिन्द्र जारी लिगको सातौं चरणसम्म लिगको शीर्ष स्थानमा रहदै एएफसी कपमा छनोट भएको हो ।

अखिल नेपाल फुटबल संघ (एन्फा) ले सातौं चरणको शीर्ष टोलीले एएफसी कप छनोट खेलाउन एसियाली फुटबल महासंघ (एएफसी) लाई प्रस्ताव गरेको थियो । जस अनुसार मछिन्द्र छनोट भएको हो ।

सातौं चरणको खेल सकिदा मछिन्द्रले ७ खेलमा १७ अंक जोडेको छ । मछिन्द्र दोस्रो स्थानको मनाङ मर्स्याङ्दी भन्दा १ अंकले अघि रहेको छ ।

यस्तै मछिन्द्रका कप्तान सुजल श्रेष्ठले एएफसी कपमा राम्रो गर्ने बताए ।

'एएफसी कप खेल्न पाउँदा खुसी छौँ । गत सिजन च्याम्पियन भएर पनि खेल्न पाएनौं । आर्मीले खेल्दा मन चसक्क भएको थियो,' उनले भने, 'टिम  राम्रो छ । हामी एएफसी कपमा पनि राम्रो गर्ने छौँ । फरक राष्ट्रका फरक टिम भएकाले केही गाह्रो भने पक्कै हुने छ ।'