नेपालगन्ज । लुम्बिनी प्रदेश स्तरीय आइटिएफ तेक्वान्दो प्रतियोगितामा पदक विजेता बाँकेका नौ जना स्वर्ण पदक विजेता खेलाडीलाई नेपालगन्जमा नगदसहित सम्मान गरिएको छ ।
शिवशिखर बहुउद्देयीय सहकारी संस्था लिमिटेडले नेपालगन्ज न्युरोडस्थित गार्डेन मार्ट डिपार्टमेन्टल स्टोर आयोजित कार्यक्रममा खेलाडीलाई सम्मान गरेको हो । शिवशिखरका संस्थापक अध्यक्ष केदारप्रसाद शर्माले खेलाडीलाई नगद र कदरपत्रले सम्मान गरेका हुन् ।
सम्मान पाउनेमा महिलातर्फ राइका चौधरी २० केजी, पुर्णीमा सुनार २५ केजी, विनिता बुढा ५५ केजीतर्फ थिए । त्यसैगरी पुरुषतर्फ कमल बोहरा २० केजी, गोपाल सोममगर २५ केजी, मोविन सलमानी ४० केजी, सिद्धार्थ बिक ३५ केजी, प्रकाश आले ६५ केजी र सोनु केवट ५५ केजी रहेका छन् ।
संस्थापक अध्यक्ष शर्माका अनुसार बहुउद्देश्यीय सहकारी र गार्डेन मार्टमा २८ जना ब्ल्याक बेल्ट खेलाडीलाई रोजगारी दिइएको छ । रोजगारी पाउनेमा चार जना प्रशिक्षक छन् । सहकारी २६ जिल्ला र गार्डेन मार्ट १५ जिल्लामा सञ्चालनमा रहेको उनले बताए । अध्यक्ष शर्माले दश बर्षमा गार्डेन मार्टको संख्या पाँच सय पुर्याउने लक्ष्य रहेको पनि जानकारी दिनुभयो । गार्डेन मार्टले देशभरमा २ सय ५० जना खेलाडीलाई रोजगारी दिइसकिएको गार्डेन मार्टका प्रनीर अधिकारीले बताए ।
दाङमा भएको प्रतियोगितामा तीन महिला र ६ पुरुषले पदक जितेका थिए । २४ वटा स्वर्ण पदकका लागि भएको प्रतियोगितामा नौ वटा पदक जित्दै बाँके टिमतर्फ उपविजेता बनेको थियो ।
