क्यानले फेरि माग्यो चार खेलाडीसँग स्पष्टीकरण

काठमाडौं । नेपाल क्रिकेट संघ (क्यान) ले चार खेलाडीसँग फेरि स्पष्टीकरण सोधेको छ ।

क्यानले दोस्रो पटक कप्तान ज्ञानेन्द्र मल्लसहित चार खेलाडीसँग स्पष्टीकरण मागेको हो ।

क्यानले कप्तान मल्लसहित उपकप्तान दीपेन्द्रसिंह ऐरी, सोमपाल कामी र बलर कमलसिंह ऐरीसँग स्पष्टीकरण मागेको हो ।

क्यानका कार्यवाहक सचिव प्रशान्त बिक्रम मल्लले खेलाडीको स्पष्टीकरण चित्तबुझ्दो नआएको र क्यानलाई नै दोषी देखाएको कारण फेरि स्पष्टीकरण मागिएको बताए ।  

'खेलाडीले स्पष्टीकरण बुझाएका थिए । तर, क्यानलाई नै दोष दिनु भएको छ । क्यान सच्चिनु पर्ने भन्नेछ,' कार्यवाहक सचिव मल्लले भने, 'खेलाडीको स्पष्टीकरण संघलाई चित्तबुझ्दो नआएको फेरि स्पष्टीकरण माग गरेका छौँ ।'

कार्यवाहक सचिव मल्लले खेलाडीबाट जवाफ आएपछि अन्य काम कारबाही अघि बढ्ने बताए ।

सेन्ट्रल कन्ट्रयाक्टको विषयमा आफूखुसी मिडियामा अभिव्यक्ति दिएको कारण देखाएर खेलाडीसँग स्पष्टीकरण मागेको हो ।  

क्यानको सेन्ट्रल कन्ट्रयाक्टको विषयमा खेलाडीहरुले असन्तुष्टि पोख्दै आएका छन् । अधिकांस खेलाडीले सेन्ट्रल कन्ट्रयाक्ट सम्झौतामा हस्ताक्षर गरेका छैन् । जसको कारण क्यानले सेन्ट्रल कन्ट्रयाक्टको सूची सार्वजनिक गर्न सकेको छैन ।

क्यानले गत वर्षबाट राष्ट्रिय टिमका खेलाडीलाई वर्गीकरण गर्दै सेन्ट्रल कन्ट्रयाक्ट दिदै आएको छ ।

वर्गीकरण अनुसार  'ए'  श्रेणीमा पर्ने खेलाडीले मासिक ५० हजार, 'बी' श्रेणीकाले ४० हजार र 'सी' श्रेणीका खेलाडीले  ३० हजार मासिक पाउँदै आएका छन् ।