जितका लागि नेपाललाई १२८ रनको लक्ष्य

काठमाडौं । आईसीसी महिला टी–ट्वान्टी विश्वकप एसिया छनोट अन्तर्गत युएईले नेपाललाई १ सय २८ रनको लक्ष्य दिएको छ ।

दुबईको आईसीसी एकेडेमी ग्राउन्डमा टस हारेर युएईले निर्धारित २० ओभरमा ५ विकेट गुमाएर १ सय २७ रन जोड्यो ।

युएईका लागि चामानी सेनेभिरत्नाले सर्वाधिक ५२ रन तथा थिर्था सतिसले ४७ रन जोडिन ।

कभिसा इगोडेजले २२ रनको योगदान गरिन् ।

नेपालका लागि कविता कुँवरले सर्वाधिक २ विकेट लिइन् ।

सबनम राई, सिता राना मगर र संगिता राईले एक–एक विकेट हात पारे ।

६ टिम सहभागी यस प्रतियोगिताबाट केवल एक टोली ग्लोबल छनोटमा स्थान बनाउने हुँदा नेपालका लागि युएईविरुद्धको खेल गर या मरको अवस्था रहेको छ ।

नेपाललाई युएईविरुद्ध केवल जितको मात्र खाचो छैन, उसले नेट रनरेटमा समेत आफूलाई माथि उभ्याउनुपर्नेछ ।

ग्लोबल छनोटका लागि नेपालले युएईलाई १० रन अथवा १० बलको अन्तरमा पराजित गर्नु पर्नेछ ।

अहिलेको अवस्थामा सहभागी सबै ६ टिमले चार–चार खेल खेलिसकेका छन् र केवल एक खेल मात्र खेल्न बाँकी छ ।

अंक तालिका अनुसार लगातार चार खेल जित्दै युएई ८ अंक जोड्दै शीर्ष स्थानमा रहेको छ ।

यता नेपाल र हङकङले समान ६–६ अंक जोडेपनि नेपाल नेट रन रेटमा अगाडी छ ।

ग्लोबल छनोटको सम्भावना कायमै राखेको हङकङले पनि आजै अन्तिम खेल कुवेतविरुद्ध खेल्दैछ ।